Ray Online｜尚海龍敲鑼慶祝首個議員議案　被主席叫停

立法會首日復會，經過資深議員提點之後，今日在席率比之前理想。之不過都發生小插曲，選委界立法會議員尚海龍提到好榮幸可以飲到頭啖湯，成為復會後第一個議員議案、開鑼登場，所以專程帶住個鑼嚟，講完之後仲敲咗個鑼一下添。呢下鑼聲令到立法會主席梁君彥即刻開聲提點，話「尚海龍議員，你唔應該打個鑼，請繼續你嘅發言」。

收起個鑼之後，尚海龍仲有另一個道具，因為佢嘅議員議案題目係「跟進國家主席習近平2022年6月30日的重要創新科技指示」，佢喺位前面就放住習近平當時到訪科學園嘅相片，而尚海龍亦都係相當中。

議員不滿尚海龍行為

Ray打聽到，有議員批評尚海龍敲鑼嘅行為擾亂議會秩序，原本復會首日係展示議員濟濟一堂、齊集議會嘅畫面，依家真係「多得尚海龍唔少」。又有議員反問咩人會喺會議上敲鑼呢，諗都知唔得啦。議員又嘲諷依家要再收緊履職要求，規定唔好喺會議上敲鑼啦。