Ray Online｜方國珊誤會打機直播是飛機失事　解釋北上後太累一時看錯

遊戲畫面幾可亂真，西貢區議員方國珊都擺烏龍，佢日前轉載一個帖文，話「這部印度民航客機，真係經歷生死關頭，相信機內乘客應該全部驚魂未定，嚇到花容失色，真係險過剃頭。🥺😰😱🥶」。雖然佢轉載嘅帖文寫上「飛機在印度機場緊急降落」，仲見到機翼出晒煙咁，但出文者亦開宗明義寫咗「曾在直播」，玩緊「GTA」遊戲。

方國珊回應《am730》查詢，話由於早前帶咗街坊去潮汕3日，好攰未回氣嘅情況下，見到有人轉載有關帖文，又將帖文上嘅「直播主」誤會成「駕駛員」，就發生呢場蝦碌事。佢話再望真啲發現畫面並唔係真，又見到帖文係嚟自打機群組，就刪除咗佢嘅轉發帖文啦。佢其後亦再喺社交網站發文話「農曆七月眼殘睇錯嘢，各位ching唔好意思 #對唔住天真咗」。

網民留言質疑方國珊工程師資格

對於事件成為網上熱話，方國珊話「真係搞笑」啦，好多謝網民好多時嘅指證同睇法，又話一直好想有多啲年輕人留言，今次證明後生仔都有睇佢啲嘢。方國珊又話今次學到嘢啦，下次可以諗吓啲吸睛、有話題性嘅內容，不過當然唔係錯嘅內容啦！

睇返網民留言，話方國珊「為大地帶來歡樂」，又話可能帳號被黑客入侵。有啲網民就質疑方國珊嘅工程師資格，話如果係真片，隻飛機一早爆咗，仲批評佢「真係唔識㗎喎」。