梁熙(右)同陳克勤(左)今日一試做機師嘅感覺。(梁熙FB)
嚟到暑假最後一個星期，繼續有一家大細把握時間搭飛機去旅行。民建聯立法會議員梁熙今日(29日)喺社交網站貼咗幅相，見到佢同黨友陳克勤一齊着恤衫坐喺駕駛艙，身後仲有密密麻麻嘅、各式各樣嘅按鍵，莫非係趁立法會放假去轉跑道「秘撈」？
睇真啲，原來佢哋坐緊喺香港航空嘅模擬飛行器入面！梁熙同陳克勤今日實則係同青年民建聯嘅代表，一齊到訪香港航空嘅辦公室了解航空事業發展，其間仲感受下做機師嘅感覺。梁熙仲發現做機師同議員有兩大共通點，就係都係一樣要撳掣、一樣要嗌咪！
梁熙(右二)、陳克勤(右一)同青年民建聯嘅代表，今日去咗香港航空參觀。(梁熙FB)
青民擬辦機師體驗活動
梁熙提到，今日到訪其實係要為青年人「探路」，青年民建聯之後會根據國家《十四五規劃》賦予香港八大中心嘅定位，設計「點亮青年未來路」職業主題體驗活動，讓有興趣嘅年青人認識香港發展方向同做好準備，仲透露青年民建聯計劃組織飛機師體驗活動，優秀參加者更可以好似佢咁，體驗模擬飛行器感受飛行嘅感覺。