區議會選舉2023｜環保署推出「區選繽紛額外賞」　8種指定回收物可賺額外1210積分｜Ray Online

區議會選舉星期日舉行，各政府部門都落力宣傳投票。環保署吉祥物「大嘥鬼」就話決定落區回收之餘，都為區選打氣喎。環保署公布，喺今個星期六同下星期一推出「區選繽紛額外賞」，「綠綠賞」會員喺推廣期內去「綠在區區」社區回收網絡進行回收，可以獲得額外1,210「綠綠賞」積分，即係代表投票日「12.10」呀。

需回收0.5公斤或以上指定回收物

環保署話「綠綠賞」會員喺推廣期內，去到全港任何一個回收環保站、回收便利點、回收流動點或者智能回收箱，一次過回收合共0.5公斤或以上嘅8種指定回收物，包括廢紙、金屬、塑膠、玻璃樽、小型電器、慳電膽同光管、充電池同紙包飲品盒(唔包括四電一腦)，就可以額外獲取1,210「綠綠賞」積分。額外積分會喺3日內直接發放去會員嘅「綠綠賞」賬戶，每一個會員只可以享有額外積分1次。

「大嘥鬼」話誠意邀請大家去「綠在區區」感受回收嘅樂趣之餘，記得1210區選齊投票，共建美好社區呀。