有網民希望市面可以開設更多實體電器店。(資料圖片)
網上購物近年大行其道，不少零售商都「變陣」加強發展網購，並考慮成本等因素後調整門市數目。有大埔街坊近日行經新達廣場時有感而發，表示現時有實物展示的實體電器舖買少見少，直言有時候買電器「都好想睇下嗰件實物係點嘅樣」，「寧願佢多間電器舖，好過多間公仔舖！」不過，她隨後坦言即使有實體電器舖，「我都係去摸下參考下，畢竟網上價錢多數平啲」，言論隨即引來網民熱烈討論。
▼網民留言討論▼
網民：難為講得出叫人開店俾你格價
有網民嘲諷稱「特登個個月交租開間舖畀你上去摸下參考下然後上網買，你仲好意思叫人開電器舖」、「你叫人開間店俾你睇完嗰件實物，轉頭網上買……難為你講得出叫人開間店俾你去格價……」、「你試諗吓開間實體舖擺嘢又唔係賣，咁不如上網賣平啲俾你哋，好過蝕舖租啦，唔使養人咩？」
發帖街坊隨後解釋，不少有門市的連鎖電器舖目前都有網店，「你覺得去店舖睇完一定要親自買親自托返屋企？」她又認為，每個品牌如果開設自己的專門店並陳列產品，當有消費者看中時「無論佢去邊度買，最後得益都係自己公司，咁會唔會相得益彰？」
有留言同意夾公仔店過多
此外，有網民就留言稱很多在實體店摸完實物參考的消費者，最後都是選擇網購，「所以實體店越來越難生存。唔好講電器鋪，連文具鋪都越來越難搵呀」，另有人同意發帖街坊所言夾公仔店已經過多，「認同，就算唔係電器舖，其他舖都好過公仔舖，係開得太多了」、「個個商場都開間夾公仔舖，對於民生唔知有咩幫助，同開賭檔無分別，十賭九輸。」
