羅淑佩回想第五波疫情「嗰陣時都唔知點過」。(資料圖片／林俊源攝)
文化體育及旅遊局局長羅淑佩曾提過自己係「Hellosss」，即係男團MIRROR成員陳卓賢(Ian)嘅忠實支持者。至於點解會認識同欣賞Ian呢？羅淑佩就話，2021年有個讀大學三年班嘅契女，因為想近啲返工做見習生而搬咗過去一齊住，自此就令佢接觸多咗香港年輕歌手、組合同韓星，包括有關Ian嘅電視節目，「我其實嗰時都冇睇，都係後尾再睇返。」佢仲記起有一次電話彈咗韓團SF9出新歌嘅通知，細問之下先發現契女原來拎咗佢個帳戶去不斷播嗰首新歌，因為愈多帳戶聽首歌就愈好，「好多呢啲知識都喺佢嗰度學返嚟。」
《留一天與你喘息》一句歌詞有共鳴
羅淑佩上個禮拜接受前助理廣播處長周國豐嘅新音樂節目訪問，被邀請推介嘅5首歌入面就包括Ian嘅《留一天與你喘息》。佢話呢首歌喺香港經歷第五波疫情期間推出，依家諗返嗰陣時都唔知點過，「又冇乜得出街，食飯又好多限制，甚至有啲晚市都冇堂食，旅行更加唔好講啦」，因此主要娛樂都係睇電視、聽歌同收音機。被問到幾時開始鍾情Ian，佢就話去到呢啲年紀已經唔係用「鍾情」，較多嘅會係欣賞。
認識咗香港年輕歌手後，羅淑佩認為令佢覺得世界闊咗啲，接觸返啲後生嘅樂迷等，又講到《留一天與你喘息》嘅歌詞「不必太煽情太過悲壯」好有共鳴。佢以失戀為例，第一次失戀嘅人會覺得個天冧落嚟，但當閱歷增加、經歷過唔同悲觀離合後，再失戀嗰時可能都會傷心，但已經會知道「真係唔使太煽情太悲壯」。
講到點樣面對情緒問題，羅淑佩覺得身邊有一、兩個信得過嘅朋友願意同行、開解好重要，因為同行可以令你知道自己唔孤單、有人願意花時間同你同行，「你自己個價值就喺嗰度」，到時就唔使理啲令你覺得自己好冇價值嘅人。佢又話，做公職都算半個公眾人物，而喺其他圈子認識嘅朋友例如同學、教會等，就可以令自己離開「壓力煲」出嚟唞一陣，叉滿電就重新嚟過。
追星咁耐，羅淑佩都好多謝有朋友善意提醒「唔好咁高調」，的確社會上會有人覺得從公務員轉任問責官員會更受關注，一言一行需要更加謹慎，平時考慮言行嘅時候會諗埋呢啲意見，至於點拿捏就笑言「見步行步啦」。佢講到周國豐邀請佢揀5首歌推介嘅時候，如果專登避開唔揀某一位歌手嘅歌，外界都可以問「咁假嘅，明明鍾意都數唔出呀？」所以佢揀嘅歌，背後都會有一個幾確實嘅原因點解會揀，而Ian同另外幾首嘅譚詠麟、陳百強同Beyond，都係之前講過鍾意嘅歌手。
讚跑車線條靚揸上嚟爽快
電影《頭文字D》20年上映，羅淑佩話因為自己鍾意揸車，前後都睇咗呢套戲好多次，「配樂啦、啲歌好鍾意」。做過運輸署署長嘅佢又透露，除咗第一架車係實淨、穩陣嘅四門車之外，其他就都係雙門跑車，「一嚟線條靚啲，二嚟的確揸起上嚟爽快啲嘅」，亦都想學《頭文字D》飄移，但笑言後嚟做咗前運輸及房屋局首席助理秘書長同運輸署署長，「更加唔可以學啦……喺香港呢個地方(玩飄移)唔係幾合法嘅。」羅淑佩仲提到，以前夜晚放工如果得閒就會揸車去機場、石澳，「打開個篷，真係幾開心嘅」，但近排已經少咗好多喇。羅淑佩本身有好多興趣，例如揸車、煮嘢食、考咗潛水牌、睇波等，佢話正正因為自己有不停學新嘢，就會持續覺得自己仲係年輕、冇脫節。
