本港絕大部分專營巴士均能接載輪椅，方便殘疾人士外出。社交平台流傳一段長47秒的影片，顯示有輪椅乘客的同行者要自行打開輪椅板，並一邊落車一邊與九巴車長口角，發布影片的網民不齒車長行為，表明已向九巴投訴。不過九巴回覆《am730》查詢指，調查發現涉事乘客在登車時，未有等候車長離開駕駛室便擅自打開輪椅板，落車時亦同樣打算自行打開輪椅斜板，車長提醒對方稍移玉步時更反被指責登車時未有協助。
▼乘客與車長口角及開輪椅板逐格睇▼
開輪椅板男子自稱「行家」
涉事巴士線為往返荔枝角美孚及大圍顯徑邨的46X線，事發於周一上午9時許，該輛46X線巴士駛至荔景山聯接街巴士站時，一名坐在輪椅的婆婆與其同行男家屬和外傭準備落車。網傳影片一開始已見3人站在上車門與輪椅位之間的通道並與車長口角，男子怒斥「頭先(登車時)你都冇開門啦」，隨即遭反駁「你都冇截車，截車先得㗎」，此時外傭上前勸阻男子，惟男子突情緒變得激動高呼「我冇截車？」
車長隨後在駕駛室打開上車門，該男子遂自然地步向車門自行打開輪椅板，並繼續指斥「我冇截車？你唔好成日戴住副黑超眼鏡就當係超人先得㗎大佬，冇截車？」車長回應稱「你睇人嚟『做』咩你」，然後離開駕駛室落車收回斜板。雙方之後在行人路繼續口角，男子批評「你唔好諗住得你一個巴士司機先得㗎大佬，大家都係『行家』嚟㗎咋」，車長表示「『行家』就唔好咁多嘢講啦」，男子聞言瞬間發火爆粗斥「×你咁嘅態度，你乜×嘢態度姐你，冇截車？」車長其後回望一眼後繼續返回駕駛室，片段至此結束。
目擊事件的網民在社交平台上載口角的一部分影片，形容「今日搭巴士個車長好型，完全唔幫呀(阿)婆婆開板收板、咁個叔叔同工人姐姐上車果陣做埋，但落車冇收板個司機仲勁×串，真係好野(嘢)」，又說雙方就登車問題口角時未及拍片，「點知落車佢比多次機會我」，並已當場透過九巴應用程式即時對話功能反映事件。
九巴：車長反被指責登車時無協助
九巴回覆《am730》查詢指，周一上午9時許一輛46X線巴士在駛至聯接街站時，其中一名乘客疑因輪椅上落問題與車長發生爭拗。根據調查結果，涉事乘客在登車時未待車長降低車身，便擅自打開輪椅斜板及將同行輪椅乘客推上巴士。及至下車時，涉事乘客亦未有等待車長離開駕駛室，便直接將輪椅推至上車門位置，打算自行打開輪椅斜板，安排輪椅乘客下車。九巴續指，當時車長隨即提醒乘客稍移玉步，惟反被乘客指責於登車時未有提供協助。九巴呼籲乘客為安全起見，切勿擅自操作巴士上的設施，輪椅乘客應待車長或外勤人員降低巴士車身及打開輪椅斜板，才上落巴士。
ADVERTISEMENT
第2輪消費賞開始！勁送iPhone / 水波爐 / 行李箱 / 電飯煲！
