鄧炳強因《獵鷹》投身警隊　終於達成多年心願遇見偶像劉德華｜Ray Online

保安局局長鄧炳強曾經多次分享，因為中學時代收睇電視劇集《獵鷹》，見劇中男主角劉德華做警察好有型，而有一個警察夢。鄧炳強唔止警察夢成真，噚日仲達成多年心願，就係遇到偶像劉德華啦！

鄧炳強同劉德華近距離合照

噚日電影《金手指》舉行首映禮，包括鄧炳強在內多個官員都有出席。事隔一日，鄧炳強忍唔住喺社交網站發文，分享同劉德華嘅近距離合照。佢話當年睇完《獵鷹》，大學畢業之後即刻投考幫辦，仲視劉德華做頭號偶像。噚晚終於達成多年心願，就係粉絲遇見偶像！興奮心情難以形容咁話呀。鄧炳強話自己唔止係粉絲，仲係忠粉，形容自己表面平靜，其實內心激動。佢多謝偶像嘅正面影響，話大家都非常愛香港。

劇中劉德華飾演嘅角色，係一名畢業之後投身警隊嘅中大社工系學生，鄧炳強正正跟住呢條路行。鄧炳強之前仲分享過想同劉德華合唱《獵鷹》主題曲「胸懷大志」。