鄧炳強讚揚印裔青年學員　指無白費過去一年栽培｜Ray Online

保安局青少年制服團隊領袖論壇上星期舉行畢業禮，保安局局長鄧炳強今日喺社交網站發文，話見到青年學員嘅成長實在令人安慰，其中一位令佢印象深刻嘅學員，就係喺香港落地生根嘅印裔青年Kobe。鄧炳強盛讚Kobe係愛香港嘅印裔青年，亦係未來棟樑，讚揚Kobe待人謙遜、積極上進，仲講得一口流利嘅廣東話同普通話。

印裔學員同時計劃投考督察及政務主任

鄧炳強「訪問」Kobe，得知Kobe因為參加保安局領袖論壇，暑假有機會去騰訊企業實習，負責公益活動，亦係佢想做嘅公共服務，幫助社會唔同人士。同時，Kobe依家係輔警，早前喺結業會操仲得到銀笛獎，佢話依家多數派駐尖沙咀，因為當區比較多非華裔人士，有時用得着佢嘅母語，適合佢發揮所長。Kobe話亦會投考督察同政務主任，嘗試唔同機會，令到鄧炳強話真係冇白費過去1年對一班學員嘅栽培呀。

鄧炳強提到今屆有好多出色學員，出年亦會繼續舉辦計劃，希望畀更多機會年輕人成長，同時發掘有潛質嘅青年，為香港培育未來棟樑。