演出節目《調教你男友》爆紅的魏浚笙(Jeffrey)，接受林柏希主持的《月傾會》訪問，由模特兒、YouTuber轉戰電視，《調教你男友》、《膠戰》再擔正演出劇集《iSWIM》，23歲嘅Jeffrey星途無可限量。被稱爲Jeffrey BB，又係姐姐殺手，林柏希問他那個稱呼最受落，Jeffrey話依家最多人叫佢做「煨Sir」。「依家叫煨Sir，因為《膠戰》第一季，有一個叫咩煨番薯，我講咗餵蕃薯，所以依家啲人會叫我煨Sir！」煨字同餵字，煨Sir話識分㗎，仲即場教大家點寫個「煨」字。
唔覺靚仔 自稱抑鬱
唔好以為靚仔冇煩惱，Jeffrey稱自己有少少抑鬱，「我有時諗嘢會好負面，我會諗到好worst，但係我會好快唔記得咗！嗰陣疫情開始好嚴重嘅時候，我會忽然間喊，有時女朋友忽然間咳，我都會好擔心，我就覺得大鑊喇，係咪發燒呢？跟住我就好驚！」
稱得為男神，林柏希叫Jeffrey自評靚仔指數，「真心，我覺得自己唔紅，咩叫紅呢？紅嘅意思係MIRROR、國際例子BIGBANG呀、BLACKPINK呀！碧咸我覺得好靚仔，吳尊我都覺得好靚仔，吳彥祖又好靚仔，呢啲先係高分囉，我呢啲唔好講喇，唔係嗰個level！」最後Jeffrey俾自己68分靚仔！會唔會太謙呀？
爆吳啟洋秘密加操
早前拍完第一次擔正劇集《iSWIM》，同場仲有Edan、Stanley同Phoebus等男神，同場較勁有冇特別操fit，「我梗係唔輸蝕啦，我每日都操緊，我又唔會扮嘢嘅！」咁邊個最扮嘢，收收埋埋自私操，「Phoebus(吳啟洋)好笑，Stanley有同佢話，『喂，Phoebus，你好似要操一操』，佢話個角色唔使肌肉，點知過咗一個月之後，佢又大隻咗喎，臨roll機又喺度操操操喎，跟住Stanley就話，『又話唔操，扮咩啫。』」