網上熱話｜連登仔視舊式茶記為「男人避風港」3大特徵令人放鬆網民睇法兩極

香港貴為美食之都，基本上想食咩菜系都可以輕易搵到，但講到有香港特色的話，非茶餐廳莫屬！食物出品不但充滿港式風味，快速的模式節奏亦附合港人生活態度。近日，有連登仔就視舊式茶記為「男人避風港」，更列3大令人放鬆的茶記特徵，未知你又點睇呢？

連登仔視舊式茶記為「男人避風港」

早前，有連登仔以「發唔發覺舊式茶記就係男人嘅避風港」為題發文，表示「每次夜晚去茶記，入面絕大部分都係俾工作榨乾嘅男人」、「差不多所有顧客都係單拖入來享受一刻嘅寧靜，一邊睇住電話，或者靜靜地食佢地碟蒸魚/碟頭飯」。

3大特徵令人放鬆

發文者除了因為茶記內大部分都是男人而有此睇法外，更列出3大令人放鬆的特徵，包括「呢度冇港女，冇情侶，但各個階層都有，即使要搭枱，但大家都自律，所以依然感覺到一種寧靜同祥和既氣氛」。「除咗氣氛良好，茶記價錢親民，去得多同阿姐熟仲會俾多碗湯，有服務之餘又唔收加一」；「雖然食材質素一般般，但勝在係即整，好少預製成份」。

網民睇法兩極

發文者於文末感慨表示「人大咗，原來其中一個最ENJOY既時候就係一個人嚮茶記食碟頭飯，因為可以放低哂所有角色，靜靜地享受ME TIME」。帖文引起網民熱議，有網民認同「正呀，最緊要一人飯堂」、「最緊要無班八婆聲喺度嘈」。亦有網民反駁指「以前覺，而家唔覺，而家越嚟越貴/唔好坐/待應態度差/食物質素一般」、「寧靜？實有廢中播抖音片」、「避風港就搵間坐得舒服啲，唔會俾人趕，俾自己靜靜地舒服吓嘅地方啦，仲茶記」。