網上熱話｜打工仔last day考慮麥記薯餅做散水餅網民舉腳贊成引麥記幽默回應

各位打工仔離職會派甚麼散水餅？年輕一輩會揀有心思的散水茶包、獨立包裝印上圖案的薯片等等，各式其式零舍多花臣。有位快將last day的網民表示適逢麥記做特價，考慮將薯餅當做散水餅，引來大批網民舉腳贊成，連官方麥記都火速作出回應，大獲網民心心。

打工仔last day撞啱M記特價

打工仔離職送散水餅是香港職場的一個不明文規定，唔係話一定要送，但唔送的話有機會惹人話柄。送散水餅的話又要思前想後送咩同考量價錢，令一眾辭職的打工仔十分頭痕。有自稱快將last day的打工仔在Threads發文，指出「今個星期五last day，仲未諗到買咩做散水餅，M記薯餅有冇得諗？」

一人一塊薯餅當散水餅

發文者有此想法，全因麥記近日推廣全日供應薯餅活動，由早上11時後至8月28日晚上12時推震撼價$10一塊薯餅，價錢平過不少專賣散水禮物的店舖。帖文甚至吸引麥記官方帳號留言，和議發文者諗法「very good idea la」。其後麥記在官方Threads順勢出post，相片出現多塊薯餅，上高用茄汁唧出不同表情，盡顯幽默創意。

網民舉腳贊成

除了得到官方支持，一眾網民亦樂見薯餅做散水餅，「都係『餅』啫」、「派薯餅有創意」、「絕對誠意十足」；又舉腳贊成稱「一定受歡迎過普通Cake」、「真心講開心過食西餅好多！」、「全公司一齊咬薯餅，場面一定超震撼」。更有人興奮表示「The best 散水餅ever！但最重要係熱辣辣先好食，要計好時間買」。