網上熱話｜港媽帶囡囡去藥房拎免費山楂餅大條道理教女要爭取網民鬧爆怪獸家長肉酸

為人父母，當然想盡自己最大努力教好及培養下一代，但有時教育小朋友都要分場合，以免影響身邊其他人。早前，一位網民去藥房購買日用品時，遇上美其名要教育囡囡的港媽，因一事擾攘令到員工及顧客都受影響，更引來大批網民鬧爆其所作所為絕對會「教壞細路」。

港媽囡囡藥房收銀處擾攘

早前，一位網民在Threads發文，表示自己日前去藥房購買日用品時，因為有一對母女在收銀處擾攘而受影響。她形容當時「拎住成手嘢準備俾錢」，但小女孩就在收銀位置「又跳又叫話要攞糖」，忙著收貨的收銀哥哥「好nice咁請佢地等一陣」，但小朋友卻未有停止。雖然收銀哥哥見發文者兩手捧著貨物，主動提出先幫她收錢，但因為港媽未有拉走擾攘中的囡囡，擔心手中貨物會撞到小朋友的她只好「就住就住咁樣拎上枱計錢」。

大條道理拎山楂餅

原本以為母女二人有甚麼特別需要，但發文者就發現「個阿媽根本無買嘢，只係順路帶個女過嚟問人拎山楂餅食」，而在細路女騷擾藥房職員工作時，這位媽媽一直開著speaker講電話，向電話中的人自豪表示「我而家教緊個女有咩想要，要勇敢去問！」

網民鬧爆：怪獸家長好肉酸

發文者對這對母女的行為感到無奈，批評「呢啲唔係叫勇敢，係叫貪心同無禮貌」、人地開門口做生意，得閒嚟免費拎餅食，人地唔洗做嘢？」帖文引起網民熱議，有網民表示「從小教育新一代要厚顏無恥」、「係咪對勇敢有咩誤解？」、「人地好人至請你食，但唔係老馮次次要俾你」，亦有人睇唔過眼鬧爆，「有咩想要，要勇敢去問，咁佢唔直接去問李嘉誠攞錢？」、「呢啲怪獸家長真係好肉酸」。