大埔宏福苑五級火｜工人姐姐留守最後保護老人小孩 網民：佢哋份糧冇包呢啲 籲捐款助受影響外傭
大埔宏福苑的五級火警，至今已造成128人死亡，印尼駐港總領事館回覆傳媒查詢指，截至周六，已確認有7名印傭不幸罹難，火災亦導致3人受傷；菲律賓駐港總領事館則確認，1名菲傭在火災中離世。有網民在社交平台threads發文，點出「宏福苑過身既工人姐姐 一樣都係殉職⋯⋯ 」，亦有人表示十分尊敬「無抌低婆婆公公落樓嘅工人姐姐」，認為「佢哋份糧冇包呢啲」、「不是所有英雄都披著披風」，更有人呼籲可以捐款到「Mission For Migrant Workers(外勞事工中心)」，幫助受火災影響的工人姐姐。
有網民形容，宏福苑過身既工人姐姐一樣係殉職
在宏福苑火警期間，曾有菲律賓人在網上發短片求助，指妹妹Rhodora Alcaraz在宏福苑當外傭，事發時正與3個月大的BB女及其母被困火場，她們最終被消防員救出送院。有指被救出時Rhodora仍抱著嬰兒，3人仍在深切治療部留醫觀察；亦有指是媽媽情急智生，將BB放入衣櫃，減少吸入濃煙的機會。菲律賓駐港總領事館表示，未收到有菲律賓人在火災中傷亡；惟印尼駐港總領事館則表示，有2名印傭在事件中離世，另有2名印傭受傷。
死前緊抱BB
宏福苑的世紀火災連日在threads上被討論，除了尋人及物資post之外，亦有網民表揚一眾工人姐姐護主之心，有女生在threads上發文，指不少工人姐姐「其實好後生好醒目又年青力壯」，可以成功逃生的機會其實好大，「但佢哋選擇留守陪住老人家同小朋友，佢地都係值得被尊重嘅一群」，更有人指出「有一個死前仲抱住bb」，在生命最後一刻仲保護緊人地嘅阿爸阿媽小朋友，形容她們是「殉職」。許多網民深表同意，「非常尊敬無抌低婆婆公公落樓嘅工人姐姐，佢哋份糧冇包呢啲㗎，真係義氣挺到底。」、「姐姐都係打份工，無義務用生命保護僱主，但姐姐都選擇用血肉之驅保護少主，人性嘅光輝」。
僱主叮囑先自行逃走 外傭：我點會忍心
另有網民在Threads發文表示，「我同工人姐姐講，如果有一日真係有意外，你無辦法扶到公公逃走，你要自己走呀知唔知？」工人姐姐卻回答：「我點會忍心。」這個帖文感動網民，有人留言指「睇到個post，消防員到場發現工人姐姐死去嘅時候仲係抱住護住個Ｂ…佢哋離鄉別井，係真係會當香港人係家人，希望可以好好安葬同埋支援佢哋家人，希望可以好好安葬同埋支援佢地家人。」、「我嫲嫲走個時，工人姐姐仲喊得勁過我。工人姐姐唔係外人，真係屋企人。」亦有人指家中工人姐姐有同樣回應，「唔得，佢唔可以咁做，要走一齊走，唔走就一齊唔走，然後我媽 我 同姐姐3個抱住喊咗陣。」
可捐款到外勞事工中心(MFMW)及白恩逢之家
對於外傭的無私幫助，不少網民都在threads上查問，如何捐錢予外傭，有人分享可以捐到Mission For Migrant Workers(外勞事工中心)，FPS 91443744 捐錢；如果屋企工人姐姐需要情緒支援，該組織同時提供免費輔導服務，可以Whatsapp 95290837。另有網民向勞工處查詢，目前因要處理通知家屬及聯絡大使館等，如果想直接捐款予遇難印傭家屬 ，要到下星期中旬才公布。
Mission for Migrants Workers (MFMW)
FPS ：+852-91443744
白恩逢之家 THE BETHUNE HOUSE
FPS：+852-93380035
ADVERTISEMENT
激送Monchhichi維港海陸嘉年華入場券！
