網上熱話｜90後派熊仔餅做散水餅 老海鮮網上鬧爆：祝佢一世搵唔到工
職場上有著各種潛規則，未有明文規定，但唔遵守的話難免會惹來閒言閒語。早前，有打工仔在網上發文，直指一位90後的新同事近日因過唔到試用期而需要離職，對方雖然有跟傳統派散水餅，但就竟然選擇派「樂天熊仔餅」，引來網民熱烈討論。
圖片來源：TVB《愛回家之開心速遞》劇照
90後同事last day 派熊仔餅做散水餅
有打工仔在網上以「新同事竟然用樂天熊仔餅做散水餅」為題發文，指公司一名90後剛畢業的同事因「過唔到試用期」需要離職，當日發文者與其他同事「本身想屈佢請我地飲茶」，但對方就坦言想「買啲禮物」而拒絕一同食lunch。原本以為90後「都算識做」，惟lunch time後，對方竟「拎住一袋惠康膠袋返黎，之後佢拎左三盒樂天態仔餅出來(家庭裝：士多啤梨味x1，朱古力味x2)出黎」，最後每位同事分到3包作為散水禮物。
「老屎忽」網上鬧爆
發文者對收到熊仔餅做散水餅感到不滿，又指對方在派餅時「仲話一路以黎多謝大家照顧」，形容對方「扮哂野，根本無人照顧佢，平時塞哂d野比佢搞」，仲「好有骨」地祝他們「工作順利」。老屎忽姿態的發文者嬲爆，狠批「依家d fg 真係唔識做，走都走得咁肉酸，祝佢一世搵唔到工，拎綜援啦食X狗」。
圖片來源：ViuTV《大叔的愛》劇照
網民：都係心意啫
帖文引起大批網民熱烈討論，有網民笑稱「一人一筒就差唔多」，而大部分網民則認為發文者要求多多，「其實都係心意姐，本身散水餅就係onX」、「點解唔撈仲要請D舊同事食野，都唔會再見，同你有親」、「返左唔夠1個月走，洗唔洗派散水餅」。
ADVERTISEMENT
20周年「全城撐本地消費3重大激賞」！ 即睇活動詳情！
