蔡俊彥在劍擊世錦賽贏得花劍金牌後返港。（周令知攝）
個多月內接連刺下亞洲冠軍和世界冠軍的新晉花劍「世一」運動員蔡俊彥今日（28日）凱旋，獲大批傳媒到場接機。自言「啱瞓醒」的新科世錦賽冠軍，延續此前「金句王」風格，妙語連珠。
夢幻登頂大呼「唔值得」
由5月的大獎賽上海站，到6月亞錦賽再到今次世錦賽，短短2個月內蔡俊彥實現重要賽事3連冠，世界排名由32名躍居榜首，蔡俊彥多次用「唔值得」形容，原來是因為一切實在太夢幻。「世界上咁多個劍手都咁努力，但係冇乜人連續贏3次，我覺得如果你冇少許幸運成分，或者冇人保佑你，你係唔會做到咁樣，所以我覺得我唔值得有一個咁嘅體驗，因為呢個體驗太夢幻喇，唔敢相信。」
Ryan透露本次世錦賽原定目標只是首輪取勝，怎料最後在短短24小時內接連成為「世界冠軍」、「世界一哥」和「年終世一」，直至傳媒告知，蔡俊彥才驚覺自己成為香港史上首個劍擊世錦賽冠軍。
已完成生涯終極目標
Ryan直言，今次世錦賽奪冠，他已經完成了全職運動員生涯的終極目標，現時暫時可以說是無憾。他寄語香港劍手們要勇於突破，跳出傳統，「我（在場上）會跳、會蹲、會衝，我係一個好不正統的劍手，可能生涯上不少人認為我這樣不行，因為以前啲世界冠軍或世界第一唔係咁打，而家我用我嘅方法，也能走上世界第一，可以話俾香港劍手，甚至世界嘅劍手，唔一定要按照傳統，只要遵從自己感受，努力練下去，都可有自己的方法突破。」
父母是最強「家底」
蔡俊彥亦感激父母支持追夢，「我見到網民話有『家底』先才可以追夢，係真嘅，但我最強『家底』係我嘅父母」Ryan表示，除經濟支援，父母從沒給他任何壓力，亦不會說要有甚麼成績才可繼續全職，只是鼓勵他喜歡便用心，「有啲好富裕嘅家庭，都未必可以俾到仔女咁嘅支持。」
破心魔變「純真小狗」
蔡俊彥自言劍擊生涯好多樽頸位，心底有股怨恨，但今次奪冠令他洗條心靈，「我成日都覺得好唔公平，所以我覺得我自己心底裏有種憤世習俗嘅感覺，但係而家攞完世錦就徹底消除咗，我而家就變咗好純嘅小狗。」
他提到，上年錯失巴黎奧運出賽資格後擔任評述，得到不少觀眾認可，不過Ryan最喜歡的依然是運動員這個身份，「我好多謝佢哋，但我比較想聽到『我有睇你比賽、我覺得你打比賽打得好好』（的說話）」。除此以外，蔡俊彥亦直線回應haters「由細到大唔希望我成功嘅人，對唔住，我得咗！」
「論實力張家朗勁過我 」
2屆奧運冠軍、前「世一」張家朗今日與蔡俊彥同機返港，世錦賽首圈止步的他選擇於另一出口低調離開。
今次世錦賽男花港隊在團體賽中變陣，改由蔡俊彥「守尾門」，Ryan表示，論實力，張家朗連續兩屆奪得奧運金牌，實力比自己強勁，自己只是暫代張家朗，「我心目中佢（張家朗）先係最佳人選」。
他更呼籲外界給張家朗時間和空間「一個人已經達到巔峰2次，佢唔係鬆懈，已經做到全世界冇人做到嘅嘢，會需要啲時間去重新恢復，呢段時間我頂多啲壓力先，等佢恢復返，我地平分壓力，隊伍會更強大。」
完成世錦賽後蔡俊彥將會稍作修整，於8月下旬恢復訓練，備戰全運會，他表示全運會將以晉級八強為目標，「我會盡力去打，但應該冇咁順，可以連續4個比賽奪金。」長遠來說，蔡俊彥則希望可以和男子花劍港隊一齊爭入2028洛杉磯奧運團體賽。
ADVERTISEMENT
第2輪消費賞開始！勁送iPhone / 水波爐 / 行李箱 / 電飯煲！
