12神功戲

本地人氣男團MIRROR近期真心威水，同一時間要兼顧世界巡迴演唱會，以及12子齊章演出的電影《12怪盜》宣傳，忙過全行99％人，日日都見報，風頭實在一時無兩。

復活節假期上畫的《12怪盜》本身亦算犀利，落筆這刻累計票房已經近1,800萬，暫時排本年度港產片第四位。電影收得固然值得高興，起碼證明到這個行業仲有得玩，但背後有些細節卻反映到這個情況未必健康。

影評人鬼哥最近在自家頻道「鬼哥睇乜戲」裡面，分享了一個關於《12怪盜》的有趣現象，有個別場次明明顯示全院滿座，但院內實際上空無一人，場面似足打醮「神功戲」。到底發生了甚麼事？原來片商推出抽獎活動，憑電影票尾就可以參加，獎品是「12怪盜團魂見面會」門票，名額得280個，難怪平時未必售罄的晨早場平價飛都被人掃清光，因為不少人用最平的價錢去博見到MIRROR的最大機會。

可能你會覺得都是一般谷票方式，只是有人做壞規矩鑽漏洞，但綜觀全局的話，你會見到一個崩壞、畸形的景象。MIRROR出發去美國開騷之前，12子便已經瘋狂謝票超過400場，吸引大量粉絲買飛入場一睹偶像風采，而當他們坐飛機出埠後，每日票房數字就立即急插，換句話說，即是有「鏡仔」才有票房，為作品本身「課金」的人不是佔多數——因為《12怪盜》質素有口皆「悲」，打開電影App影評區，見到一般觀眾彈多過讚，八成都會打退堂鼓，剩餘兩成人都是時間太多或者錢太多。

有了《12怪盜》這份經驗，「鏡仔」的經理人公司MakerVille肯定領悟出一個道理——電影拍得好不好睇都是次要，只要安排到MIRROR成員到戲院亮相，自然有人肯買帳！這個搵錢方程式如此簡單，有少少智慧的人也會食過返尋味，火速拍板落實開拍多套低成本電影去賺錢，好像富有中國特色的玄幻片《12生肖》、12子一個場景齋噏到完場的《12怒漢》，以及充滿教育意義令大家更深入了解人體奧秘的《12指腸》等，然後就坐定等收錢。的確，這樣肯定發過豬頭，但院線場次有限，必定會趕絕一些有heart之作，非常不健康。

最近兩日睇到一篇ERROR隊長肥仔(梁業)的專訪，它嘗試以另一個角度描述此現象，文中不但講到肥仔呻MIRROR在前，自己好難出頭之外，更說師弟KC(黃家灝)同Tsoul(田曜誠)做跳舞明星注定艱辛，想他們做定思想建設，「夠紅，丟咩出嚟都有人睇，行出街屙屎都有人睇。」真的，其實如果純粹想搵錢，MIRROR是是但但求求其其book個場玩猜包剪揼，都好多人願意俾錢入場睇，毋須花大量人力物力開戲。揀得開戲，都應該是想做好件事，可惜事與願違，最hurt都應該是12位鏡仔。