Makerville新樂隊ROVER。
ViuTV嘅母公司電訊盈科，早排公布業績，我想從娛樂嘅角度分析下。
電盈由賺變蝕4.71億，ViuTV同相關業務(包埋Makerville)個EBITDA(你當係收益啦，雖然同真正嘅賺錢有分別)就係1.9億。即係個仔賺錢，但成頭家係蝕緊，所以啲人成日批評ViuTV賺到錢都唔俾多啲資源落班藝人度，呢個睇法有啲唔啱。須知道呢啲大公司唔係自己搵自己使，有幾多資源係要睇成頭家嘅財政狀況。所以應該係話：電盈雖然蝕錢，但仍然願意投放資源讓藝人發展。
睇到呢度係咪以為我收咗錢寫稿？我冇本事做財演，只係因為近排有件事令我心寒。
Makerville新樂隊ROVER出道，好多鏡粉留言，話公司有錢都應該用嚟捧MIRROR唔應該捧新人，又話MIRROR最搵錢，未搞好佢哋冇理由搞其他。大家好似唔記得咗MIRROR係點出道咁。
ViuTV點解有人鍾意，係基於一個中心思想：呢個世界最緊要有選擇，新嘅嘢有機會，無論係人定創意。無可否認MIRROR係公司目前最成功嘅藝人，作為佢哋嘅fans，應該擁抱孕育佢哋出嚟嘅呢種精神，而家反而質疑公司俾機會新人，咁同一班打工仔初入行時鬧班「老油條」阻住晒，有日自己升咗職，就變成唔俾新人上位嘅「老油條」有咩分別？用呢種心態，MIRROR 12個人亦根本冇可能出道。
咁係咪班fans因為愛所以變咗呢？定係ViuTV應該「與時並進」，集中資源喺已經紅咗嘅藝人，而放棄未受大眾關注嘅嘢呢？大家有冇留意最近好多人問邊度有得買大光麵。點解？就係因為ViuTV有個節目叫《茶餐廳》，令大家重新愛上呢個已被邊緣化多年嘅香港品牌，電視節目今時今日竟然仲可以有帶動消費嘅影響力同心地。大光麵獲得支持，係因為佢哋用心同高質素做嘅麵。有心、有質素，往往唔係最賺錢，但咁唔代表就唔值得獲得資源同機會。否則即使MIRROR一直紅，都冇令個呢個圈甚至世界變得更好。
