綠化天台除了環保之外，仲可以創造就業機會。信和集團10年前就同匡智會合作推出「商廈天台綠化計劃」，將九龍灣宏天廣場的天台園圃交俾匡智會園藝訓練學員打理，學員會喺天台種菜及盆栽，收成後，就會設置攤位義賣供租戶選購，收入所得又會全數撥捐匡智會作為經費支持營運。呢項計劃至今已聘用12位匡智會學員，亦有3,500位租戶參與，收成約1,000公斤，並為匡智會籌得約200萬元。
信和昨日舉行「信‧綠承傳」啟動禮，並慶祝該計劃10周年，Ray都有出席，期間聽信和集團執行董事兼可持續發展委員會召集人楊光講，計劃不但為商廈天台構成翠綠怡人的花園，亦能為匡智會學員提供工作體驗。由於計劃成功，楊光仲透露準備喺下個月邀請旗下物業租戶及住客擔任大使，獲選者將於8月到黃金海岸酒店參加兩日一夜的體驗營，學習及推廣綠色生活。
聽完主辦單位嘅介紹，Ray都有同匡智會學員鄭漢文傾偈。佢話園藝能夠培養耐性，令佢哋做事更有條理，因為需要知道何時種菜和施肥，颱風來襲時要做應急措施。佢10年前參加計劃，後來成功就業，依家喺瑪麗醫院工作。