今日註冊迎娶郭思琳 吳浩康緊張失眠：演練時已喊咗

吳浩康(Deep)與郭思琳(Margiela)奉子成婚，於今日正式註冊迎聚已懷孕3個月的郭思琳，雖然因疫情影響物流，Deep要在山邊執樹枝裝飾婚禮布置，但沒影響兩人心情，將為人夫的Deep自爆緊張到連續兩晚失眠，向來眼淺的他在綵排時已落下男兒淚，「自己朝早起身去睇set up，企喺度諗要講啲乜嘢？有邊個會嚟？要多謝邊一位？瞓唔到，兩日都五點幾、六點就醒咗，所以都幾攰同幾緊張。朝早自己演練嘅時候已經喊咗。」

讚老婆有孝心

對於老婆郭思琳，Deep讚不絕口，「我鍾意我太太係一個好率直、好簡單嘅人，有乜就講乜，同佢相處唔駛估，係好嚮往同佢相處。佢唔止對父母好上心、好愛錫，對其他屋企人都好關心好照顧，好欣賞佢對家庭呢個態度。」問到給太太幾多分？Deep笑言，「嘩！俾太太幾多分都唔夠喎，唔可以亂咁俾分，呢個係我啱啱新婚學識嘅事，所以太太一定係超過滿分㗎啦。」

調節心態 學做人夫

Deep坦言要重新調整心態，學習做丈夫，「無論係相處、對事件嘅睇法、價值觀都唔同咗，所以而家變得謙卑咗。過往當大家溝通有問題嘅時候，會覺得，『喂！你唔明白我。』、『我係啱嘅。』、『我識呢件事，你應該要聽我講。』而家會調番轉，『可能有啲嘢我唔知呢。』、『可能我未識呢。』、『可能我唔了解呢。』我都需要重新去學過，希望可以幫到個關係。」