上星期先報導過，《小丑》導演Todd Philips post出續集劇本，並且影埋男主角Joaquin Phoenix睇劇本嘅相，似乎原版人馬事在必行。點知原來仲有2單更爆消息！
話明《小丑》，梗係想見到小丑女。Margot Robbie因為喺《自殺特攻》演小丑女而成為影壇新一姐，《小丑》風格截然不同而且係屬於DC另一個多元宇宙，當然唔可以又搵Margot Robbie做。要搵另一個夠爆嘅小丑女，一啲都唔易。外媒報導，片商華納初步同Lady Gaga傾緊，但係未有耐傾得成。
Lady Gaga只係拍咗2套戲，憑《星夢情深》(A Star is Born）同《Gucci 名門望族》(House of Gucci)已經入圍金球獎影后提名，演技有返咁上下。要演繹喺精神病院遇上繼而愛到泥足深陷變成小丑女嘅精神科醫生，以Lady Gaga嘅爆發力，搵佢做好合理。
更何況，而家有傳，《小丑》續集會係歌舞片！Todd Philips正正係《星夢情深》嘅監製，有經驗處理音樂電影，搵唱跳演都得嘅Gaga做女主角？直情係不作他選！
原文刊登於 Yahoo娛樂LOL，am730獲授權轉載
