葉太今日同一班行政會議非官守議員，參觀港鐵嘅短期展覽「站見」。(葉劉淑儀FB)
港鐵喺紅磡站舉行短期展覽「站見」，展出「黃頭」、「烏蠅頭」等退役列車同埋相關物品等。一眾行政會議非官守議員今日(22號)就率先去到展覽參觀，召集人葉劉淑儀就喺社交網站話，參觀期間聽住港鐵職員嘅細心講解，就好似置身時光隧道咁，一邊緬懷昔日旅程，一邊感受發展嘅變遷。
相信展覽滿足到鐵路迷
葉太喺社交網站貼出多張相，包括佢坐喺俗稱「黃頭」嘅九鐵第一代電氣化列車車廂，佢就提到當年部分車卡設有煙灰缸及小餐枱，行車期間仲有服務員向乘客賣雞髀等小食，相信同當年車速慢、車程長有關，仲話依稀記得當年同媽媽搭火車去羅湖返內地探親時，服務員喺車廂賣雞髀嘅情景。
葉太又話，參觀完個展覽都覺得港鐵的確花盡心思，展出好多有趣展品、鐵路歷史同小故事，而佢哋參觀之後更獲贈一套復刻版車飛，佢相信呢個展覽同豐富嘅展品，一定滿足到一班鐵路迷。