屯門大興花園事故同層套三房，以低市價25%蝕讓價沽出，收租客無睇樓接貨 上手3年帳輸兩球。
租金高企下，即使屬事故單位同層戶，亦具承租力。中原地產屯門瓏門二期第二分行高級分區營業經理鍾宏遠表示，減息帶動買家加快入市，屯門大興花園日前錄得2期8座高層E室二手成交，實用面積587方呎，屬三房連套房間隔，原叫價480萬元，日前在買家無樓睇情況下，以400萬元沽出，平均實用呎價僅6,814元，成交價較市價約530萬元低約25%。
租客住緊不設睇樓 料回報逾4.5厘
鍾宏遠稱，上址位於事故單位同層，因租客未搬走，不能安排睇樓，但會交吉易手。新買家為投資客，見現時租務市場持續暢旺，加上預計減息，見上址議價空間大，樓價吸引，潛在租金回報可觀，故無睇樓亦照入市。按單位市值月租約15,000至16,000元計算，租金回報料約4.5至4.8厘。據了解，原業主於2022年以604萬元購入單位，持貨約3年，現帳面虧蝕約204萬元，期間貶值約34%。
ADVERTISEMENT
立即更新/下載AM730手機APP 體驗升級功能
