特快公屋｜兩年前獲派黃大仙煙花景戶 網友好奇「廟前窮廟後富」問儲到錢？樓主親自回應(有圖)｜網上熱話
「特快公屋編配計劃」(2025)已於本月2日開始揀選單位，今期「特快計劃」提供約2,150個公屋單位，其中獨立單位佔1,277個。有網民早於兩年前在Facebook群組發文，表示透過上述計劃揀到位於黃大仙竹園南邨雅園樓一個高層單位，面積約380方呎，更稱「去之前做哂功課選咗十幾個單位，擇樓前一日逐個單位去視察環境，第一志願擇咗竹園南邨，去到擇樓當日發現自己心水只剩下呢個，就好似上天安排嘅一樣，感恩」。
樓主之後大讚單位及環境配套，「收到信去睇樓景觀開揚，一行上去就係街市商埸，行幾百米就係黃大仙地鐵站，祝各位早日派到心水樓安居樂業」，同時附上數張單位相片，可見單位外望開揚景觀，更可遠眺維港煙花景觀。
不少網民留言恭喜樓主，「好大間，舒服陽台好寬」、「又大又光猛又開揚，好正呀」、「冇得輸，正南向維港，高層開揚，恭喜」、「四四正正，高層開陽，交通方便。好似座向都好好，恭喜！」、「呢個公屋設計好人性化，真係幾好，有露台，可以晾衫，間隔都四正，容易擺位，又開揚無遮擋」。
⇊竹園南邨雅園樓高層單位⇊
單位因「自然身故」落入特快公屋
相隔約兩年後，再有網民在該帖文留言問「住咗年幾就嚟兩年，係咪超正超好住呢？」，樓主亦親自回應「係呀。」再被問及「廟前窮，廟後富，樓主是否面向黃大仙廟，住左咁耐，儲到錢嗎？」樓主則指「我前面仲有一座樓隔住」，未有正面回答問題。另有問單位為何落入特快，樓主解釋單位因「自然身故」。
帖文亦吸引網民分享自己或身邊朋友揀選特快公屋的經歷，「我都係特快，做足功課揀出十幾個單位去了10個8個邨，最後一日見到一個漏網之魚，只係同對面屋有爭執搬走的。正啊高層望內園景，和諧式5-6人單位，好新正。揀樓嗰日第一批，馬上要揀咗。安居樂業四年了」
「頭三日冇得揀，基本上你都唔使旨意諗獨立單位。我上年嗰批入住咗長者屋，牆身仲衰過劏房牆，隔離屋啲噪音會傳晒過嚟瞓唔到，隔離屋舊冷氣一開仲嘈過自己間屋嘅分體機。半夜三更有人起共享客廳 大聲聽歌傾計冇人理。 如果你揀正間屋條廁所渠係横渠要預咗成日塞。如果樓下係街市你預咗極之多嘅曱甴四圍走」。
「特快公屋編配計劃」是根據公屋資源情況推出，並以自選單位形式進行。於計劃中可供揀選的單位大部分是受歡迎程度較低的公屋單位。申請者在揀選單位時，並沒有地區限制，惟須依據其公屋申請的認可家庭人數，並按個別單位的編配標準，在可供揀選單位名單中，自行揀選單位。
由於「特快公屋編配計劃」的申請人數眾多，但可供揀選單位有限，且分布區域並不平均，房屋署不能保證申請者能獲邀揀選單位或成功揀選單位。房屋署只會在仍有適合申請者的揀選區域及/或單位類別的情況下，才邀約申請者揀選單位。
ADVERTISEMENT
立即更新/下載AM730手機APP 體驗升級功能
