伍家謙見證住港隊的發展，由無乜觀眾，到現在坐無虛席，令他不禁有感而發。
香港代表隊在亞洲盃外圍賽的首場主場比賽，在啟德體育園內進行，在全員爆滿之下，港隊最終憑史堤芬彭利拿的12碼，以1:0擊敗印度，取得今屆賽事的首場勝利。足總在周一（9日）宣布啟德體育園的5萬門票已全數沽清，意味這場啟德首場足球賽事，將坐無虛席，大會在場內宣布今日入場總人數為42,570人，在香港球壇上絕對是一個紀錄！伍家謙今早在社交平台稱「近五萬人，係一個從來未出現過嘅數字。」
他回憶當年做體育記者一些點滴，指2014年阿根廷訪港，在記者室遇到認識的阿根廷記者，他指對方的問題令他印象甚深。對方問到︰「點解你哋啲球迷幫我哋打氣仲多過幫主隊嘅？好少見。」伍家謙直言當下不懂回答，他說︰「嗰下，我真係唔識答。惟有求其講句：『係呀我哋都幾好客㗎哈哈哈。』睇本地波有咁上下耐嘅球迷應該都會記得，呢啲嘢，係真嘅。其實2014年情況已經叫好咗啲啲，再早期啲嗰陣，本地足球係成日畀人掛喺嘴邊攞嚟嘲弄訕笑；夜晚邊睇直播邊寫稿剪片，間唔時有人行過連比數都未望就掉低句「咦輸緊幾多呀？」；做啲港甲(當時頂級聯賽)，甚至港隊嘅報道，稍為長啲，試過畀人質疑：『唔駛咁長啦，冇乜人睇。』」
重溫香港對印度精彩場口︰
他認為港隊如今獲多人捧場，一切都得來不易，他說︰「想講嘅係，港隊嘅賽事從以前嘅幾百人到今日賣晒四萬幾五萬張飛；由入場嘅人大部分支持對家，到而家全場一齊唱港隊勁揪，其實真係好困難，好唔容易。世上冇嘢係無緣無故，盛況亦唔係一下子爆出嚟，而係由09年東亞運金牌開始、到2015年世界盃外圍賽、再到2023年亞運四強，一點一滴咁累積返嚟，好唔容易。」
他續說︰「累積嘅除咗經驗同技術，球迷嘅base亦都一樣係儲番嚟嘅。近五萬人，係一個從來未出現過嘅數字，其實好難期望入場嘅全部都有睇開、個個都知一向點打氣、又或者點著衫；有咗第一次先會有第二次，所以，只要入場係為港隊打氣吶喊，已經好正，互X無謂。」
他又指昔日自己「藐一啲為湊熱鬧入場嘅人，所以喺fb寫咗幾句……而家睇番，先知道自己以前係幾咁幼稚。湊熱鬧入場，有何不可？總有人係由湊熱鬧開始慢慢變做die hard球迷。鍾意一件事，你會想佢好；任何嘢都一樣，要搞大個餅件事先有機會好。」