四大探長｜王晶開鏡被指劇情翻炒選角不當 網民：射龍門達人變呂樂？
「四大探長」為傳奇故事，先後多次被改編成電影，影射當年呂樂、藍剛、韓森同顏雄四名華人探長嘅貪污史。資深導演王晶日前再度開拍16集網劇《四大探長》，與一眾演員舉行切燒豬拜神開鏡儀式，並公開演員名單，惹起網民熱議。
「御用惡人」黃子揚出演「呂樂」
呂樂為「四大探長」之首，人稱「lak哥」或「樂哥」，過往多年來先後被曾江、劉德華、梁家輝及吳鎮宇等影帝級演員飾演，王晶呢次執導嘅《四大探長》則搵嚟黃子揚出演「呂樂」。黃子揚曾參演《逃學威龍》、《98古惑仔之龍爭虎鬥》、《賭俠1999》等經典港產片，多飾演反派角色，因而被封「御用惡人」。
對於演繹「呂樂」，網民就表示唔睇好票房：「搵到佢做呂樂，票房唔知有冇20萬呢」、「王晶十幾年前到金錢帝國都用梁家輝啦，有乜理由而家用東星何勇」、「『射龍門達人』竟然變『呂樂』？認真奇情！」等等。
網民：仲要翻炒四大探長幾多次？？
又有唔少網民覺得「四大探長」呢個題材已經拍到悶，指劇情翻炒又翻炒，紛紛留言：「仲要翻炒四大探長幾多次？？」、「黃晶是翻兜又翻兜。賭戲來來去去都是來自千王之王（謝賢）的橋段。」、「仲有人課金先至奇」、「呂樂的題材拍了九萬幾次，讓一些創意可以嗎」、「呢個題材佢要炒幾多次冷飯」、「年紀大了，接受不了新事物就拍舊東西給自己看吧！」、「江郎才盡，得閒就詆毀後輩的老廢。而我就不信他拿錢去拍，九成是坤水魚投資」、「又來，沒其他題材？怕連任達華李修賢都超越不了」等等。
雖然如此，但都有網民指起碼王晶可以出到糧，唔似《反黑2》欠薪：「但係又咁講呀！好多人冇工開起碼有嘢做先啦！只想人人有工開」、「晶哥起碼有工開，又唔會走數先啦」、「你唔好理，佢又真係搲到錢，唔使賣慘又出足糧」等等。
原文刊登於 Yahoo 娛樂圈
立即更新/下載AM730手機APP 體驗升級功能
