曾展望與Sophie《女神配對計劃》慶功宴上似足一對新人。
TVB節目《女神配對計劃》圓滿結束，《女神配對計劃 最後告白》昨晚亦播出最後一集，五位女神及求愛勇者們，昨晚與幕後工作人員齊齊食住飯睇大結局，期間五位女神輪流爆喊，不但為自己的配對感動/感觸落淚，亦為其他四位女神的配對結果情緒極盡波動；當大家齊齊齊見證葉蒨文（Sophie）與曾展望（GM）的「甜蜜世紀配對」時，全場更陷入「狂喜之巔」，氣氛既感人又熱鬧。
五女神中的三位女神葉蒨文、梁敏巧（Maggie）及羅毓儀（Yuki）成功與心儀求愛勇者GM、劉啟進（Matt）及林俊其（Kris）配對成真正CP，當中GM向Sophie連講三次「我愛你」，以及最後來個抱頭式的霸道總裁式「世紀之吻」，再加Sophie興奮到忘形的「開心揼地尖叫」，更成為昨晚一整晚熱話，不少網民大讚GM愛得真摯、勇敢又霸氣，並直指二人的「配對」已直接昇華至求婚甚至結婚現場。
18地粉絲熱捧GS
該段精華片段，除了有GM與Sophie的「霸氣世紀之吻」回顧，原來還暗藏彩蛋！原來Sophie與GM配對成功後，主動提議GM玩「同心鎖」，為這次難忘的浪漫配對旅程留下美好回憶：「呢幾個月我哋都經歷咗好多嘢，我好想同你寫低...我哋嘅感想，跟住喺度留低一個回憶。」Sophie選擇寫下的，是她在第一天海選時說過的霸氣Bite：「我唔需要嗰5秒」，至於GM寫下的則是一生不變愛的承諾：「你係第一個，（亦係）最後一個我會想用盡全力保護嘅人。」
GM、Sophie深受觀眾喜愛，來自18個城市的GS粉絲，為兩人準備了一個「官宣應援」，由今日開始於旺角投放，直至9月21日。應援官宣內容：「愛不僅是剎那間的心動，更是長久凝視彼此靈魂後的選擇，恭喜GM和Sophie，選擇在對方眼中安放自己的世界。」至於慶功宴現場，三對成功配對的CP，以不同形式進行「愛的官宣」！GM與Sophie應全場要求即場還原世紀之吻，原本GM有點害羞、不斷採取拖字訣，但最後敵不過全場起哄，「十秒！十秒！」，GM最終把心一橫捉實Sophie雙臂，二人開始在熱鬧的十秒倒數聲音下錫錫；但搞笑的是，當倒數至三時，Sophie突然向後縮兼怕醜地雙掩面，獲監製起哄大叫：「要重頭嚟過！」GM聞言搞笑崩潰大叫：「夠喇！」可惜還是遭監製再三要求redo，最終GM搞笑向監製下戰書：「你再講我錫你呀！」場面混亂又搞笑。最終幾經「喧鬧」，GM再度主動捉實Sophie手臂並溫柔地吻向Sophie額頭，並於極短時間內連錫四吓，此時頑皮的監製又起哄：「錫埋塊面啦！」GM亦「順攤」地連錫Sophie面珠仔四啖，如此甜到漏，難怪不少網民大讚是新婚現場。
GS合唱《情非得已》
之後，GS繼續公然放閃，曾展望強調親吻Sophie並非是交功課及為大家而錫，之後男方雙手摸住女友，當他準備啜女友嘴仔時，Sophie即篤GM嘴邊並說：「有條菜喺度。」全場立即爆笑，GM亦惟有尷尬傻笑，現場立即起哄，Sophie更一度O嘴，旁邊的關嘉敏更不禁爆出一句：「佢都係你條菜啦依家！」引來全場歡呼和應。話明「新婚現場」，結完婚禮成當然有下場，事緣眾人睇完大結局，再前往After Party慶功，席間GS再度大耍花槍！事緣眾人直播期間，又再起哄大叫GM與Sophie錫錫，被起哄之聲吸引入鏡的Sophie，隨即搞笑地大叫：「GM，過嚟！」之後再搞笑地霸氣捧住GM面，並「強行」吻向GM面珠，結果成功引發全場起哄，受寵若驚的GM更要「飲水定驚」，旁邊有人大笑GM濕晒，相當好笑。之後，二人又徇眾要求合唱GM海選時的面試歌曲《情非得已》；期間二人遭起哄拖手，結果因為GM太害羞，最後又是要Sophie主動伸出玉手讓GM拖。
Sophie接受娛樂新聞台訪問，被問到為何在「最後告白」中「一秒轉身」鎖定GM，她笑言：「因為由開始到依家都考慮咗好耐啦嘛，咁我覺得我個人就係：『係就係，唔係就唔係！』決定咗就做囉！」GM則坦言未被揀中一刻，心情都依然忐忑：「我都冇乜心情睇佢哋（其他求愛勇者），我都囉囉攣…其實（我）都唔係講咗好多（嘢），因為我（當時）好亂。」Sophie：「其實頭先有all in 嘅感覺。」至於梁敏巧著二人合巹交杯，Sophie即小鳥依人躲在GM後面，之後GM一杯清，當正自己結婚向大家講「多謝晒」。
