成龍、梁家輝澳門出席《捕風追影》首映禮。(娛樂組攝)
由成龍、梁家輝、張子楓、此沙、韓國男團SEVENTEEN成員文俊輝、周政杰和林秋楠等合演的電影《捕風追影》，今日(24日)於澳門舉行首映禮，相隔20年再合作的成龍、梁家輝，聯同兩位新生代演員文俊輝、周政杰和自編自導的楊子齊齊現身，吸引大批影迷支持，場面墟冚，成龍更與文俊輝和周政杰擺心心，大派福利。成龍笑言動作戲不難應付但被專業對白考起，「要講專業述語，同埋講得好快，要講講講！」梁家輝則自言演技向來不錯，今次在成龍和成家班的指導下挑戰動作戲，實是雙得益彰。
讚成龍言行身教
成龍、梁家輝，文俊輝和周政杰接受傳媒訪問，互笠高帽，成龍笑言，「文戲方面，家輝哥喺現場都會點醒我，動作方面就我點醒佢。」成龍自言跟家輝雖自《神話》後已沒合作，但仍然相熟，甚有默契，不料，梁家輝就踢爆指兩人甚少聯絡，只間中食飯相聚，他形容成龍看似開放，實質隱蔽，「佢係開放俾大家，但唔開放俾身邊嘅人，但呢次真係遇到個全新嘅成龍大哥，佢好開放，無論文戲、武戲都對所有新人有好好嘅傳教方式，包括我。佢就係言行身教，呢樣嘢喺我哋電影界好難得，因為我哋每一個人都好自私做自己嘅嘢，尤其是香港電影，所以好感激佢。」成龍強調著重實感少有AI或CG，盡量真人親身上陣，大讚挑戰動作戲的家輝哥，表現足可提名最佳動作新人獎。
難忘真刀對插 有機會拍續集
談到最難忘的打鬥戲，必然是兩人以真刀互插，梁家輝憶述，「拍攝時佢揸住我對手拍，每一刀(成龍︰真刀呀)佢都揸住我對手做，叫我做表情得喇！」成龍即席與周政杰示範，補充指：「佢第一刀就篤落我隻眼到，我叫佢唔駛驚、冇事冇事，因為如果佢一驚就唔夠膽再做。（用真刀驚唔驚？）梗係驚啦！我搵菜刀劈佢嗰時都驚呀！」梁家輝直指當時相當驚險：「一刀劈落條木樑上面，劈斷三條頭髮跌落我塊面！」成龍補充只是劈斷假髮的3條毛髮。問梁家輝可會打上癮，再挑戰高難度動作時，他就自爆上次拍《神話》千方百計逃避動作戲，今次自覺有進步，他又搞笑撓著成龍的手，「只要你願意，我哋都仲有機會。」成龍坦言導演在開拍《捕風追影》已有意開續集，但如今觀眾受落，相信大有機會，家輝承諾，「只要佢出聲，anytime、anywhere！」兩人又爆元秋的戲份全刪，全靠成龍開口才能返幾個鏡頭。
有意拉大隊返港拍戲
現年71歲的成龍仍無意言休，他又大談來年計劃，「唔係我唔想退休，好lucky有導演，劇本搵我，可能佢哋知我唔單止係武打演員，好surprise我可拍文戲。有部戲如果明年開得成，我會拉大隊嚟香港拍，片名唔講得。」近日張曼玉重新活跳於幕前，問到可會合作時，成龍表示，「梗係想，但要導演決定，未必我可揸主意，但明年這部戲我會搵楊紫瓊。」談到梁家輝近月陞升外公，成龍大感驚訝，而梁家輝亦首次親口承認，「第二個女都生咗一個喇！」其細女梁靜曦誕下混血小王子Thibeaux。
立即更新/下載AM730手機APP 體驗升級功能
