曾樂彤接受許文軒，談獨立歌手之路，又透露徐浩求婚過程。
曾樂彤作客TVB娛樂新聞台節目《StarTalk》專訪，接受主持許文軒(Edmond) 訪問，大談成獨立歌手之路，以及另一半徐浩求婚經過。曾樂彤從去年開始正式成為獨立歌手已推出了5首歌曲，她說：「自己都覺得自己好勤力！覺得自己能夠成為獨立歌手都係一個緣份。其實本身自己喺呢個階段想諗下自己條路點行，呢個reset其實可以嘗試唔同嘅嘢，或者搵返自己嘅初衷做演員拍電影，後尾發覺喺唱片公司期間，自己越嚟越鍾意寫嘢，鍾意用創作、寫歌詞嘅渠道去表達自己，仲有好多自己鍾意嘅嘢未寫，雖然都有寫歌詞畀其他歌手，但係數量未係好多，而自己亦都唔係一個鍾意等待嘅人，咁就不如主動出擊，自己寫畀自己。」
談到新歌《單身不會死》未有邀請另一半徐浩擔任監製原因，她說：「其實我從來都冇規限要用邊個監製，徐浩係我人生第一隻碟嘅監製，之後嗰幾年都有試唔同嘅監製。如果佢得閒就同佢合作，唔得閒就搵另外啲監製，其實佢都好忙，又要做巡迴，亦有好多人邀請佢寫歌，既然搵佢同搵其他監製都要排隊，冇得打尖，亦都要俾錢，最多佢係平少少。咁啱《單身不會死》作曲兼監製陳考威，都識咗好耐同埋之前合作過，所以一拍即合。」
問到何時與徐浩擦出愛火花，她說：「佢幫我做第一隻碟嘅時候大家各自都有拍拖，而且佢係有前輩嘅感覺，好尊重同尊敬佢，因為佢大過我好多，有成12年。去到早幾年合作《躲不開的一課》之後，大家咁啱都係單身，同埋交流多咗先至慢慢開始。
提到早前徐浩宣布求婚成功，她說：「講緊初初拍拖嘅時候，都有同佢討論過結婚呢個話題，我有同佢講我係一個唔結婚嘅人，不婚主義，覺得開開心心拍一世拖咪得囉！佢就話佢會令到我改變諗法，當時我覺得呢個人都幾堅，好勇敢。」她又說女求婚已經係前年的事，「佢喺巴黎度求，當其時仲有其他朋友，以下嘅部份佢冇特登安排，咁啱我哋住嗰間酒店，職員去到夜晚11點幾嘅時候，突然同我哋講可以上天台睇巴黎鐵塔12點閃燈，咁我哋咪上去囉，跟住佢話漏咗啲嘢返去房攞，跟住就求婚。平時啲人求婚會跪低，但係佢好似孖寶兄弟咁跳起再跪低，我睇返條片佢係有啲blackout，我都有啲！因為佢太驚令到我覺得好多疑問，你係有準備定冇準備，佢口都震晒，我會覺得係搞笑多啲！」
ADVERTISEMENT
