朱芸編開音樂會帶觀眾遊走生死 認同Winka拍拖後出街姿整咗
配樂師兼二胡演奏家朱芸編，將於下月在西九大盒舉行《BETWEEN WORLDS》音樂會，他將透過一段段精心編寫的樂章，分享他的個人體會，對生死以至不同世界之間的好奇。
音樂會以探討生死為題，朱芸編邀來多位本地優秀的音樂家與藝術家合作，他說：「我有好強嘅陣容，無論服裝定視覺藝術，都有好好嘅藝術家幫忙，我會寫新曲，就算唔係新嘅，都會重新編過。」提到音樂會構思，他期待以自己的音樂，帶觀眾走進不同的世界：「今次我用咗四幅畫做靈感，去引發四個世界。我相信唔同世界有它本身嘅規則同文化，形成唔同嘅價值觀，BETWEEN WORLDS 就係想探討生命與生死之間，究竟咩係起點？死亡又係咪終結呢？死亡亦可能係連結唔同世界嘅橋樑。」
7歲開始學習二胡、高胡及板胡的朱芸編，認同大眾對二胡有刻板印象：「由粵語殘片到而家，可能都係(劇情)死人冧樓先有二胡，好悲好悲咁，我冇特別要打破大家嘅印象，我就係好想表達自己係咩人。我都認同二胡同大眾有距離感，所以就希望用呢個音樂會去拉近距離，但首先就係我同觀眾唔好有太大距離先。」朱芸編早已視二胡為自己的生命，是他抒發情緒的媒介，藉着這次的音樂會，透過二胡去表達自己的生命起伏。
朱芸編指，自己有很多情緒，無論是感動、浪漫、興奮還是傷心：「其實唔係咁表面，有好多唔同嘅感覺，我覺得呢啲好難用言語表達。講出嚟反而唔係嗰樣嘢，對屋企人又好、女友都好，我一向鍾意用音樂去表達，如果所有嘢都畫公仔畫出腸就唔好睇。」提到他憑電影《破．地獄》榮獲《亞洲電影大獎》原創音樂獎、《金像獎》最佳原創電影音樂，以至近日的《第20屆中國長春電影節金鹿獎》及《第二屆金熊貓獎》電影單元最佳音樂獎，朱芸編感激電影《破・地獄》讓他加入二胡的元素：「我諗好多香港人都睇過《破・地獄》，我相信佢哋唔會有距離感，甚至可能覺得好好聽，其實我已經好開心啦。」
除了音樂上成就，朱芸編與Winka的戀情同樣備受關注，自從兩人公開戀情後，不時大方分享甜蜜，他笑稱：「我哋兩個都多咗一個範疇嘅聽眾，而我哋嘅樂迷，都好接受大家嘅音樂，所以都幾開心，係每次出街都姿整咗，個頭要梳好啲，哈。」
朱芸編下月於西九舉行《BETWEEN WORLDS〉音樂會，更藉此探討生命。