2025-10-13 16:30:00

林子祥獲許冠傑彈琴祝壽陳奕迅唱完《數字人生》五體投地

林子祥(阿Lam)、葉蒨文(Sally)的紅館演唱會去到第四場，昨晚是阿Lam 78歲生日，全場8,000位觀眾跟阿Lam齊齊賀壽，當Sally唱完《零時十分》時，她說，「今晚有邊個生日，好似識一個人生日⋯⋯係你！」隨即爆出故仔，「我嗰陣第一次唱《零時十分》，問佢乜嘢意思，佢話：『林振強咁寫嘅，我唔知喎。』跟住佢唱《十分十二吋》，我又問乜嘢意思，佢又話唔知！你講啦！」阿Lam即謂：「總之我而家個車牌都係1012！」全場即刻爆笑。

女兒April美國回港賀爸爸

Sally之後帶領全場唱生日歌，着台上大屏幕播出重量級嘉賓祝賀片，包括劉德華、郭富城、楊千嬅、李克勤、容祖兒、洪金寶，連運動員林丹同導演賈樟柯等，，絕對是粒粒巨星，許冠傑更為多年好友彈奏一曲祝壽。正當以為驚喜完畢，Sally話：「仲有你識嘅人！」阿Lam兒子林德信同太太抱住孫女林明上台，孫女仲錫錫爺爺，甜到漏！Sally哽咽透露更大驚喜：「個女April啱啱喺美國飛返嚟！」原來阿Lam完全被蒙在鼓裏，父女相擁場面感動到爆，流下男兒淚。

演唱會去到尾段，驚喜一浪接一浪，前來觀賞的Eason陳奕迅，突然現身舞台，令阿Lam及Sally十分驚喜。3人更於台上合唱《數字人生》，由於歌曲節奏愈唱愈快，唱完後，Eason五體投地、甘拜下風問二人：「你哋點做到？」十分搞笑。完show後，阿Lam跟Sally返到後台，主辦及工作人員送上幾個蛋糕，為阿Lam慶祝生日，這個12點前的驚喜，阿Lam照單全收，多謝大家的祝福。