林家謙演唱會尾場，竟請來宣萱擔任嘉賓。 (林俊源攝)
林家謙一共十場紅館演唱會《White Summer》今晚圓滿落幕，尾場獲多位圈中人捧場，包括其「老Best」Tyson Yoshi與太太Christy、宣萱、陳康堤、許廷鏗、Gin Lee、鄧小巧、胡子彤、阿正、梁釗峰、陳健安等，而每場嘉賓也是焦點所在，之前九場分別請來鄭秀文、JACE、梁詠琪、鄧麗欣、莫文蔚、楊千嬅、Kiri T、陳慧琳、張栢芝，尾場嘉賓連日來引發不少揣測，網上傳來會是一位樂壇天后，容祖兒、林憶蓮也先後出現在流傳名單之上。
多謝林夕黃偉文
來到最後一場，林家謙在唱出《緊急應變逃生法》時，從台上彈出來跳起一刻，發現他肚臍位今晚寫上「898」來迎接十場個唱終於落幕。
唱《破·地獄》前，他如常講解演唱會主題，在尾場特地多謝林夕為《夏日之子》填詞，「歌詞完全表達我喺呢個show想講嘅嘢，『酷熱伴颱風 誰累了誰/人亦有兩重自我 如伴侶/紅日和白雪 請配對』所有嘢都有兩面，點樣攞個平衡係最緊要。」接著家謙又多謝黃偉文為《春日部》填詞，「兩首歌真係可以總結成個show嘅主題同意思。」他深感如日方中，都可以有陰影的時候，「當你最成功嘅時候，身邊係會充斥好多魔鬼，未必想害你，但好容易令你陷入唔係太好嘅境況囉；而當你以為係最低，你最容易搵得返身邊所有天使，你會見到原來有好多人幫你錫你，希望你哋抱住呢種平衡。」
一啖砂糖一啖屎
每場尾聲，當打開盲盒後才會揭曉當晚嘉賓，今晚林家謙唱了半首《四季物語》時，全場期待盲盒開蓋看到誰是嘉賓，竟然空無一人，家謙問道，「係咪好期待盒有嘉賓，人生就係咁，有啲嘢以為佢有，唔係每一次打開個盒，都有你想要嘅結果。」他憶述在第4場的講Talk位後，鋼琴未能及時升上舞台，他要拖延時間，就想到曾聽過一個訪問，受訪者分享「人就係要有高高低低，太順係學唔到嘢」，他深表認同，接著指出，「講呢句說話嘅人，今日喺度。」此時坐在觀眾席的宣萱應林家謙的邀請，緩步走上台，笑言：「一啖砂糖一啖屎，正當你以為無嘢，原來又有嘢喎！人生就係咁㗎啦！」宣萱走上舞台即問家謙「我係咩，你係咩？」家謙火速「執生」：「你係砂糖，我係屎。」
宣萱：叫聲媽媽
林家謙所指的是宣萱在《女人方言》的訪問，提到「人生順境嘅時候係學唔到嘢」一番言論。宣萱在台上自言跟家謙一樣變態，常覺自己甚麼都不是，她解釋訪問中的言論，「每人都有高高低低，高都學到嘢，但會Focus喺開心嘅嘢度。低嘅時候唔開心、記得好多唔開心嘅嘢，就刻骨銘心啲，提自己唔好犯同一個錯誤。」家謙自爆6歲看過宣萱電視劇《難兄難弟》，不慎爆了當時是1997年。宣萱憶述首次見家謙時，曾追問：「你係咪真係睇過《難兄難弟》？」家謙即搶白：「睇到大結局呀！」不料。宣萱爆出一句：「叫聲媽媽！」笑爆全場。
家謙激似羅嘉良？
其後，家謙自爆被人指他唱歌似羅嘉良，宣萱再笑說：「個樣都有啲似，因為佢平時講嘢冇乜表情。」家謙即抗議：「我有呀！好多表情包。」宣萱指家謙不用挈大口唱歌，家謙笑言要慳能量，宣萱即答道剛才肚餓也吃了餅乾補充能量，家謙笑言宣萱坐Tyson附近，「可問隔籬嗰個借雞胸，佢隨身攜帶！」引來全場大笑，宣萱自言亦有聽Tyson的歌，「我知你有首歌叫《Jessica》，係咪呀？」與太太Christy一齊睇騷的Tyson尷尬點頭(原歌名是《Christy》)，家謙即哼唱了幾句「Jessica」打圓場。最後宣萱和家謙合唱 《難兄難弟》和《在空中的這一秒》，宣萱表現驚喜，全場報以掌聲鼓勵。
破例兩度encore
向來開騷不設encore的家謙，今晚破例的兩度encore，首先encore是自彈自唱《聽風》，由於觀眾仍不肯離場大叫encore，他再次出場，由衷心多謝大家一起分享這個夏天的夢，他自言不斷微調演唱會，「多謝入場的每一位見證住呢個《White Summer》的蛻變，多謝全勤嘅你哋，如果有嘅話，多謝屋企人係一定全勤。」接著首次公開演唱未錄音的新歌，於晚上11時39分為演唱會畫圓滿句號，比之前九場延長約45分鐘。
ADVERTISEMENT
🥮請你食皇玥經典流心雙輝月餅🥮
👇🏼立即登記參加👇🏼
