林芊妤 Coffee 錯手掉去兒子暑期作業 傷心自責做阿媽好失敗
9月1日是所有學生開學的大日子，放完一個悠長假期，返學校第一件事當然是要交暑期功課，不過正在陀第二胎的林芊妤(Coffee)，卻自爆在開學前一晚，才發現掉了囝囝翟德彥(伯)暑期作業，囝囝冇功課交，令她非常內疚。
Coffee自責：「我做阿媽真係好失敗」，她還原事件表示：「話說我個仔喺暑假放咗10日已經做晒啲暑期功課，我都幫佢檢查完無問題，跟住佢好有手尾，將暑期作業收左喺書櫃同小一啲書本放埋一齊，頭先同佢喺度執書包，先發現……幫佢間房大掃除嘅時候，當時係諗住幫佢掉晒啲小學一年班嘅書同埋作業，點知我連檢查都冇檢查，就連埋做完既暑期作業都一齊掉埋。」
Coffee 指囝囝知道後非常傷心，除了因為當時功課做得很辛苦，同時亦怕老師責備，Coffee內疚續指：「本身已經係大頭蝦，再加上大肚婆真係會特別大懵同埋蠢，我呢排已經係咁做埋啲傻野，今次仲要連累埋個仔，好唔開心呀！！！！我點解會咁㗎？！真係最怕有個豬隊友媽媽……令我最內疚嘅係我個仔好明白事理，淨係扁嘴同我講驚聽日返學會老師鬧，比着如果係你哋，咁樣掉咗你哋嘅暑期功課係咪會好憎阿媽？」
Coffee今早續更新事件最新情況：「發現自己掉左佢辛辛苦苦完成左既100頁嘅暑期作業後，其實當刻真係好想逃避好唔想話佢知我整唔見，因為我怕佢會唔開心訓得唔好，但過咗幾分鐘之後，我沉澱完自己心情就喺度諗醜婦終須見家翁，然後就同佢自首咗，都同佢好真誠咁講左對唔住，再寫咗封信俾佢今日交返學校俾新老師，跟住今朝一早7點幾我就打電話返學校，親自同老師解釋咗同say sorry ，老師都好明白事理話唔緊要叫我唔好太自責，做晒就ok反正個學習過程先係最緊要。」
她又讚班主任好好，相信兒子今年都會好幸福，並謂：「我以後會食少啲蝦，唔好再做大頭蝦。」Coffee又分享今早問過兒子，如果下次媽咪再次大頭蝦，他會怎麼做，兒子表示：「我下次會將暑期功課擺定係書包入邊，再寫紙貼住提你唔好掉咗我啲功課。」她即感動謂：「唉……啲咁諗，有個咁懵嘅阿媽，個仔應該會比較醒，比較有責任心既 。」
ADVERTISEMENT
🥮請你食皇玥經典流心雙輝月餅🥮
👇🏼立即登記參加👇🏼
