柳應廷Jer為《Chill Club》錄影，視為演唱會前熱身。(娛樂組攝)
柳應廷Jer昨日(12日)為ViuTV音樂節目《Chill Club》錄影，他表示將會於節目中演唱8至9首歌，圍繞他從小伙子進化成歌手的故事，主要選唱他喜歡或帶著夢想的歌，當中包括一些翻唱歌曲，可視作為11月底亞博兩場《Jer Lau "The Shape of Breathing" Live 2025》演唱會的熱身。Jer透露上年年尾已開始構思演唱會概念、歌單和舞台效果等，他形容：「所有嘢向住正面方向前進，非常期待。我確保每一位入場觀眾都可以拎到驚喜走！」至於何為「柳之呼吸」，他表示：「其實人嘅每個階段都經歷咗好多事，我呢次呼吸係叫大家靜低落嚟，聽自己呼吸或者同自己傾偈，未必係講我，每個入場觀眾都可慢慢坐低，諗吓自己人生經歷咗的咩，慢慢呼吸或者去感受唔同的感受。」
胸肌比大表哥多一吋
個唱暫定開兩場，加場與否要視乎反應，他笑言，「很多人早咗問我攞演唱會飛，好似另類宣傳(海報風波)，平時冇咁快，(飛債多唔多？)好多，如果反應再熱烈啲，就要加場。」談到邱士縉(Stanley)在IG story指若演唱會加場，Jer將會除衫，Jer聞言即表示，「我冇講過，佢亂講！如果我加場，真係要邀請Stanley上台除衫！」談到「Gym柳」與大表哥的胸肌battle，Jer豪言，「唔好話媲美，我勁過佢啦！(邊一part勁過佢？)我邊一part都勁過佢，我真係有大胸肌㗎！總之佢39吋嘅話，我就40咁啦！」對於大表哥曾指他自拍胸肌相，Jer強烈否認，「佢誤會咗啲乜？將平時自己啲嘢講出嚟都有嘅！我好少自戀到呢個地步！」接著他認真表示，做運動是令自己學習專注，「除衫就隨緣啦，可能有首好性感嘅歌我會除衫。」髮型方面，他預告開騷時會有新形象，更揚言可能會剷光頭，「好有型，好似Lokman嘅skinhead，(立flag要找數！)諗吓啫，可能聽日又有另一想法。」
承諾為Jeremy補祝生日
Edan亦有轉發Jer開騷消息，但就抵死地加了一隻小豬做掌上握的動畫，似是影射他，Jer笑言，「大家誤會咗，意思係好似隻豬咁勤力做掌上壓。」談到Stanley、Anson Lo和Edan同為Jeremy慶生，「生日群組」獨欠Jer，他解釋要為演唱會和新專輯準備，撞日子而缺席，「我有同佢講生日快樂，約定咗佢遲啲會補祝生日，請佢嚟我餐廳食！」早前柳闆的「根 root cafe」舉辧感謝祭，他以神秘咖啡師身份親自沖咖啡，他笑言自己技術高明，不用額外練習，但就直言食肆生意難做，「多謝fans支持才渡過難關，其實而家都好難，不過繼續努力，心血嚟，無論裝修或諗法。」
新歌《記憶倒行》早前收集聽眾故事，由Jer親自代為傳話，並拍片紀錄感動時刻，他表示已完成製作，將會在短期內推出。最後，問到新專輯將會是黑膠或CD推出時，他大賣關子，「大家會有surprise，可能有第三個選擇，(卡式帶？)可以諗吓，到時你就知。」