江若琳（Elanne）接受《am730》專訪宣傳2025年第一首派台作品《流著淚寫句號》。(林俊源攝)
歌手江若琳（Elanne）上年8月加盟新公司Moving Pictures正式回歸樂壇， 並且先後推出兩首派台作品《一直留在心底的事》、《一圈》。Elanne日前接受《am730》專訪宣傳2025年第一首派台作品《流著淚寫句號》，她說：「好多歌迷同我講細細個聽我嘅情歌長大，好似有《錯愛》同埋《傷情路》。我發現大家都係比較鍾意情歌。」
江若琳指曾經也在感情路上有經歷過迷失。(林俊源攝)
自爆經歷失戀之痛曾跳車
Elanne憶述曾經也在感情路上有經歷過迷失：「其實同每一個前度分手都唔會係好開心，大家以前都一定會有美好嘅回憶，但去到中間嘅時候就會變得好淡，又或者到最後對方做啲咩都好唔順眼，大家都會對大家好厭倦，到最後關係完結都一定會唔捨得，最熟悉嘅人會變成最陌生嘅人。」談及過往的失戀經歷，她坦言：「一定會喊，細個時候失戀一定會好戲劇化，自己去維多利亞公園攞住罐啤酒，望住個海喺度喊。拍拖就好似拍MV咁，一言不合就會跑走，又會跳車，我相信好多人青春都會經歷過呢啲事。」她繼續指長大後懂得和平分手，與前度大談不合適的原因。
Elanne鼓勵粉絲不要害怕失戀。(林俊源攝)
謝絕老公Oscar與前度聯絡
講到較早前在社交網上與網民討論有關遇見前度的問題，Elanne說：「我會多謝每一位前度嘅出現，學識愛一個上一課，下一個戀愛對象咩類型會適合自己？喺愛情裏面唔需要將就，搵到一個夾嘅人好重要。愛情唔係一路付出就啱，改變去迎合對方係唔快樂嘅。」她鼓勵粉絲不要害怕失戀，並表示：「失戀就會知道下次遇到啲咩人，即刻揀一啲唔啱你嘅人，唔需要行冤枉路。」至於會否選擇與前度聯絡，她回答：「真係唔會，其實真係好殘忍。我都好佩服嗰啲話分咗手做返好朋友，其實真係冇乜可能，我覺得大家最好各自安好。」
被問到最近網上高度討論有關「前度邀請出席婚禮的問題」，Elanne直言：「我覺得好震撼，所以我都有問老公結婚嗰陣時要唔要邀請返啲前度擺一圍。同我老公蕭唯展（Oscar)傾偈嘅時候都好願意分享前度，有啲人會唔講唔提，好似以前冇拍過拖咁。我同我老公以前未結婚本身就係朋友嘅關係，所以就好清楚大家嘅情史。」她指會介意老公與前度聯絡：「佢會介意我同以前嘅前度聯絡，我又會介意佢同以前嘅前度聯絡，呢樣嘢大家都好公平。」
江若琳一家三口。
新歌與Dear Jane班底合作
談及新歌《流著淚寫句號》，Elanne表示：「呢一首歌又係全新嘅合作班底，點解會拖到六月先出新歌？係因為太多屋企嘅事忙碌，其實由我上年開始做過，每一首歌都堅持一定係要好鍾意，同埋我好想合作嘅班底，我上一次已經問Dear Jane成員翁厚樑（Howie）嘅邀歌，我覺得佢嘅歌寫得好入心入肺，尤其係講失戀方面，編曲得好好。」講到與填詞人Oscar合作，她分享：「我覺得佢好有才華，喺合作嘅過程就已經好快達成共識，同埋我第一次嘗試呢一種曲風。」
Elanne大談新歌《流著淚寫句號》創作概念。(林俊源攝)
指新歌用了三天錄製完成
被問到錄製新歌所遇到的難題，Elanne說：「係非常難嘅，因為真係我未接觸過呢一類型，有少少rock嘅曲風，同埋要跟住黃兆銘啲編曲走，所以我特別都用咗一段時間去摸索，而今次嘅監製係關禮琛，佢同我講唱呢類型嘅歌唔可以有任何嘅保留，唔好諗住要好靚好華麗，要放開自己所有嘅包袱。」她指新歌總共花了三天時間去錄製完成，並笑稱：「呢首歌都真係算係我錄過最難錄嘅歌，我好期待有機會唱現場表演。」
Elanne接受《am730》專訪宣傳2025年第一首派台作品《流著淚寫句號》。(林俊源攝)
親自邀請張繼聰擔任MV男主角
提到今次新歌MV的拍攝趣事，Elanne分享：「今次嘅MV係搵咗張繼聰做男主角，我上年出嘅兩首歌都係人哋幫我去演出，我就出咗好少嘅鏡頭，不過今次呢首歌我就覺得要自己參與同埋演戲，今次嘅劇情都想個男主角好有演技，由愛情嘅甜蜜走到去中間嗰一種死心，望住對方要流淚，知道大家準備要告別。我覺得要搵一個好有演技嘅男主角先可以駕馭得到，所以我第一件事就諗起張繼聰。」講到邀請張繼聰合作一事，她表示：「我一晚自己send訊息俾佢，佢就話得啦冇問題，最緊要話俾我聽做啲咩。最緊要我可以演得出。喺拍攝嘅時候，張繼聰嘅演技震懾左全場嘅人，佢仲要幫大家諗埋劇情點樣先夠痛。」
談及拍攝新歌MV最難忘的鏡頭，Elanne表示：「有一個鏡頭係要一鏡到尾拍攝，劇情講話要重返舊時，但係又要即刻回到現實，需要10秒之內換衫，就係要挑戰即刻換衫，又要將間屋10秒之內重新佈置，呢個MV真係好值得人去睇，因為都係大家嘅努力，鏡頭會有燭光晚餐嘅場景。」她分享特別難忘當時拍重頭戲的場面時竟然出現停電的情況。
大談產後首次拍劇經歷
提到產後首次拍劇經歷，Elanne分享：「啱啱拍完一套劇，呢套劇係短劇，拍咗四至五日左右，終於可以去返片場。個感覺好奇妙，但係都好開心，其實我都好唔捨得個仔，拍戲真係冇咗全日，當開工嘅時間，就係佢瞓覺嘅時間。」講到拍劇最大的考量的問題，她表示：「我都驚掛住個仔出唔到街，所以我都有作出考慮，好彩個地方唔係好遠，喺佛山嗰度拍，如果真係掛住佢，交通都好方便，所以我同我老公協調得好好，等BB覺得爸爸媽媽唔見咗，起碼爸爸喺度陪我。」
歌手江若琳（Elanne）相隔十年，終於推出樂迷萬分期待的全新情歌《流著淚寫句號》。
望40歲前再挑戰拍《高舉．愛》題材
講到現階段最常挑戰嘅角色，Elanne說：「其實我好多角色都想試，現階段做咗媽咪可能戲路闊咗，可能挑戰媽媽嘅角色，我而家揀劇本係睇挑戰性同埋好唔好玩。」至於會否考慮再挑戰拍《高舉．愛》題材的電影，她表示：「我覺得我40歲前可以，40歲後嘅體能就唔得。其實呢啲戲幾好玩，可以挑戰自我，我好鍾意呢種題材嘅電影，真係好寫實，可以全程投入角色。」
江若琳拍《高舉·愛》狂食奶粉增肥20磅。（資料照片）
透露兒子今年八月正式開學
講到與老公管教兒子策略，Elanne表示：「其實我哋管教佢，最緊要佢開心就好，但係真係要定立一啲規矩，因為佢而家開始乜嘢都會喊同埋大叫，跟住就一定要嗰樣嘢，佢又要求要自己沖涼同埋食嘢。」她指自己必須要調節心態更加有耐性去照顧兒子，並憶述小時候階段：「我以前阿媽就係會打嘅，由細打到大。」談到如何分配父母管教孩子的方式，她分享：「老公會惡阿仔一吓，話俾佢聽唔可以咁樣，爸爸聲量大佢就開始驚。」她透露兒子將會在八月開學，所以現階段盡量會選擇多陪伴孩子出國旅行。
被問到現階段的工作安排，她說：「其實由我正式派歌做返歌手，現階段工作已經開始變多，因為之前除咗揀歌，BB好多嘢都需要面試，同埋好多學校嘅嘢要準備，以前覺得事業係第一，阿仔嘅學業就會變第一。」她透露即將會參加內地的音樂會演出，為了專注投入演出，所以未必會帶孩子一同出席。