江若琳（Elanne）最近《am730》接受專訪宣傳即將於八月舉行的「江若琳 THE WITNESS 心的見證演唱會2025 」。(林俊源攝)
歌手江若琳（Elanne）上年八月復出樂壇，她今年亦有推出新歌《流著淚寫句號》。Elanne最近《am730》接受專訪宣傳即將於八月舉行的「江若琳 THE WITNESS 心的見證演唱會2025 」，她表示：「上一次開演唱會已經係2017年，兜兜轉轉終於會喺下個月24號（Elanne）喺麥花臣開演唱會。」Elanne分享這次演唱會的主題是「THE WITNESS 心的見證」：「即係代表見證者，我覺得所有陪伴我大嘅朋友，都係見證我人生嘅高低同埋出道，或者一同見證我哋細個嗰陣嘅回憶，又見證我生小朋友，同埋見證我重新出發。」
Elanne分享這次演唱會的主題是「THE WITNESS 心的見證」。
麥花臣開騷與歌迷拉近距離
為什麼會選擇在麥花臣開騷，Elanne說：「好多人都會問我幾時喺香港開演唱會，一直都搵緊場地，但發覺原來啲場地都係好爆，九展又冇咗，我好想搵一個溫馨嘅場地，我覺得麥花臣係好好嘅選擇，我喺麥花臣睇咗好多演唱會，場地唔算好大，但都算係好近距離。」
江若琳透露積極在構思演唱會的歌單。(林俊源攝)
透露演唱會歌單
Elanne透露積極在構思演唱會的歌單，並表示：「歌迷鍾意聽嘅都係可能現階段我未必駕馭到嘅歌，例如《夢境日和》、《愛你還是愛美》、《傷情路》和《錯愛》。如果冷門嘅歌曲就有《水火不容》同埋《變走他》。呢啲歌令到我勾起咗我嘅回憶。」Elanne預告除了演唱個人歌曲外，還會翻唱心目中喜歡的歌手所推出的音樂作品。
江若琳指過往開二次演唱會唱的最後一首歌都是《大步喊過》。(林俊源攝)
回顧唱歌事業低潮期
談及過往開演唱會的經驗，Elanne直言：「其實每一次都好傷感，第一次開完演唱會之後，我記得當時係2010年，當時開完演唱會之後就要放低唱歌事業，之後我需要去內地拍劇，我記得當時候演唱會環節係最後一首歌就係唱《大步喊過》，落台嗰陣我就爆喊，唔知幾時先會再有自己嘅舞台，結果又要等七年。」Elanne憶述第二次開個人演唱會正是忙於打官司的階段：「我嗰一個時刻都係用《大步喊過》做演唱會嘅總結，我知道開完呢個演唱會未必有機會唱歌。嗰陣時我都覺得冇機會再出歌。」
Elanne真情剖白有一段時間害怕聽自己唱過的音樂作品：「一聽呢啲歌我就會覺得好唏噓，冇諗過結咗婚之後又生咗仔，又可以重拾返自己嘅夢想，其實都幾感動，啲歌迷話以前喺台上睇江若琳唱歌都係一個減數，知道每一次都倒數緊。我2024年開始出返嚟唱歌，啲歌迷就會話現階段就變成加數，會有好多機會睇到我喺台上唱歌。」
江若琳真情剖白有一段時間害怕聽自己唱過的音樂作品。(林俊源攝)
預告演唱會與歌迷集體跳《Show You》
提到昔日開騷勁歌熱舞的片段，Elanne說：「嗰陣時細個嘅體力好勁，跳20分鐘完全唔喘氣，嗰陣時好記得我婆婆仲在生，嗰陣時每一日都會蒸兩條蟲草俾我補氣，所以演唱會嘅狀態係非常好，我又去做健身。」被問到屆時會否與歌迷一齊跳經典跳舞快歌《Show You》，Elanne直言：「如果係就好啦！因為帶動氣氛真係好難，好多話希望我喺香港開演唱會嘅朋友仔，就每一首歌都背熟歌詞，希望到時可以一齊大合唱。」Elanne分享演唱會有一連串的快歌跳舞環節，有機會唱《有請下位》和《第一眼》等快歌。
江若琳預告演唱會與歌迷集體跳《Show You》。
邀吳卓羲做嘉賓重現《學警狙擊》CP?
至於會否考慮邀請昔日曾在電視劇《學警狙擊》中演情侶的吳卓羲擔任演唱會嘉賓，她表示：「叫佢嚟做嘉賓跳舞？我諗都要睇吓對方有冇時間，因為我知道佢都好忙，佢長期都喺內地，我諗係我哋排好晒所有嘢嘅流程之後就可以構思到底邀請邊一位藝人出現是最有意義。」
「江若琳 THE WITNESS 心的見證演唱會2025 」於7月8日起 UUTIX 公開發售
門票價格：$1280(VIP) / $980 / $680
VIP門票福利：
1. 演唱會後台上一對一合照
2. 專屬編號紀念門票
ADVERTISEMENT
20周年「全城撐本地消費3重大激賞」！ 即睇活動詳情！
