2025-09-20 18:19:22

聲秀｜林錦興出局惹侮辱爭議吳浩康被重提吸毒舊事嬲爆要求公開對質

無綫全新歌唱節目《聲秀》逢周日晚8點翡翠台播出，向來肉緊組員的導師吳浩康（Deep），在《聲秀》第三輪對決中因為組員林錦興（小林）獻唱《浮誇》表現不佳被淘汰，痛心疾首向對方說了一番話，希望對方日後更能珍惜及把握機會。可惜隨著網上陸續爆出不同聲音，有人聲稱播出的版本，與吳浩康於現場錄影時向小林所講帶有「侮辱」成份的訓話有分別，因而引發網民熱烈討論！

小林結果只得73分，於該集被淘汰後，小林在小紅書等平台上聲稱「有大瓜」（勁爆話題）被導師公開辱罵，直認將為人父的小林，被網民cap圖發現他在微信群組上直指吳浩康曾經涉毒被捕，根本沒有資格教仔。翻查小林的IG，他在出局發文有多謝各單位，唯獨卻未有提及吳浩康。是非成為網上熱話，吳浩康在社交平台上直言要跟小林「當面對質」。對此，《聲秀》昨日（19日）透過無綫官方社交平台公開一刀不剪的吳浩康完整「訓勉」片段，以正視聽！片段所見，吳浩康雖然是向小林「訓勉」，但全程不但帶著遺憾、無奈及壓抑的語氣，而且更邊說兼眼泛淚光、強忍淚水，言辭真摯、懇切又痛心。

片段開頭，小林先向導師道歉並承認是自己的問題：「Deep Sir，係我自己冇去做好咁多管理自己嘅方式，安排唔到自己嘅時間去練習，呢個係我嘅問題，對唔住。」隨後，吳浩康指出在整個訓練過程中，小林其實有很多時間及空間可以扭轉結果，但對方卻選擇了放棄，整個比賽期間完全沒有就阿Deep的建議爭取作出改善，白白浪費機會。

Deep除了一再點出小林比賽期間的不足外，還希望以自身父親的身份提醒即將為人父的小林、令對方更能因而深切體會「責任感」這項人生重要課題。Deep：「接落嚟要做人爸爸，要學識珍惜，要學識面對，唔好再解釋喇。解釋只係解釋之前點解我會做得唔好，唔好再創造遺憾。呢一刻見到，呢一刻就把握機會。」、「日後你要做人爸爸唔係做歌手咁簡單，唔係淨係浪費自己嘅機會，唔好再唔記得，知道嘛？否則日後仔仔要打疫苗，你都唔記得，就慘啦。」最後阿Deep還不忘祝福小林：「加油，且行，且珍惜。」片段播出後，亦有網民留言力撐吳浩康。

吳浩康「訓勉」完整版本

「你有空間接受真實回應㗎嘛？其實喺訓練嘅過程入面，有太多太多時間，係可以畀你扭轉呢個結果。而今日呢個遺憾，你當初已經揀咗。如果早兩個禮拜投入去練，會係點呢？我好難接受有人同我講忙，我好難，我忙到全香港都知，我一樣可以抽四個鐘擺低家爺仔乸嚟教你。結論呢？三個禮拜前同你講嘅嘢…Sorry…一個禮拜前同你講嘅嘢，你返番嚟上堂，我同你講番一個禮拜前嘅嘢，冇郁過。」

「所以嚟緊要做人爸爸，要學珍惜、要學面對，唔好再解釋喇。解釋只係解釋之前點解我會做得唔好，唔好再創造遺憾。呢一刻見到，呢一刻就把握機會。希望你透過呢一次嘅演唱，學識尊重，學識珍惜。尊重一啲為你付出嘅人，尊重你嘅舞台，尊重每一次機會。珍惜每一個為你付出嘅人，珍惜你嘅機會，珍惜你嘅時間，把握機會，日後你要做人爸爸唔係做歌手咁簡單，唔係淨係浪費緊自己嘅機會。」