譚俊彥和郭柏妍與一眾演員今日（6日）出席TVB劇集《麻雀樂團》宣傳。（娛樂組攝）
譚俊彥和郭柏妍與一眾演員今日（6日）出席TVB劇集《麻雀樂團》宣傳，譚俊彥接受訪問表示最近與家人一起享受看劇的樂趣，全家都非常支持新劇《麻雀樂團》。被問到子女有否想過拍劇，他直言：「冇喎！暫時未聽到佢哋好想拍戲，佢哋會唔會拍戲都係等佢哋大個先決定，鍾意做就去做啦！做阿爸嘅管唔到。」
李佳芯是劇集《麻雀樂團》的女主角。
譚俊彥望李佳芯參與新劇宣傳
講到女主角李佳芯缺席劇集宣傳，他分享：「琴日喺個group嗰度（演員群組），大家都話今日宣傳會着咩衫，跟住李佳芯就喺個group嗰度講佢喺馬來西亞拍緊戲，但係都絕對會支持大家。我相信如果佢返到嚟香港，佢一定會喺度（宣傳）。」他繼續指一直有留意李佳芯在社交平台分享的動向，並表示：「雖然同佢相隔好遠，但我哋係一家人，感情都仲喺度。」講到有否關心李佳芯較早前透露身體狀況不適一事，他說：「佢一開工就好容易唔舒服，因為佢又好認真，又有壓力好大，我相信監製都係好錫佢嘅朋友，會照顧得佢好好。」
譚俊彥指一直有留意李佳芯在社交平台分享的動向。（娛樂組攝）
郭柏妍自爆第一次剪短頭髮
郭柏妍接受訪問大談新劇的一大挑戰：「呢一次係我第一次剪短頭髮，喺套劇裏面又有拉大提琴嘅戲份。」她指在劇中與譚俊彥有最多對手戲，並表示：「我好鍾意一家人嘅感覺。」被問到拍下一套劇集，會否夠膽挑戰更短的髮型，她表示：「我覺得要睇返角色嘅需要，只要配合到個角色，冇嘢係冇可能嘅，可能都會有啲唔捨得。我最近睇到高海寧拍新劇《璀璨之城》都為咗一個角色去剪頭髮，好多前輩或者高海寧都有講過一句說話，就係講話頭髮都會長㗎嘛！所以為咗角色我係可以接受。」
郭柏妍指在劇中與譚俊彥有最多對手戲。（娛樂組攝）
郭柏妍願仿效胡杏兒拍《肥田囍事》增肥
講到胡杏兒當年拍《肥田囍事》增肥40磅，被問到是否願意仿效為拍劇而增肥，她說：「增肥，我諗應該可以吧！但我都唔知，我都未諗過。不過我自己都有睇《肥田囍事》，所以我覺得一個演員真係可以咁樣為個角色，真係好難得，我好鍾意食嘢，但我唔知做唔做到，睇吓到時有冇呢一個角色可以發揮啦！」
ADVERTISEMENT
送 CulinArt 1862 HKD500元餐飲禮券及八月四大購物展入場券！
