2025-09-28 12:13:09

關智斌獲謝霆鋒捧場唔敢請上台笑談Tyson Yoshi台上爆粗：我聽唔到(有片)

關智斌(Kenny)一連兩場的「關智斌《The Endless Adventure Live in Hong Kong》演唱會」，周六晚（27日）已在啟德體藝館圓滿結束，尾場獲Mani霍汶希及大師兄謝霆鋒捧場，並請來「打風Gym Buddy」Tyson Yoshi擔任嘉賓。關智斌完show受訪直言未夠喉，談到尾場未有唱《眼紅館》便完結，他解釋要遵守場館規矩，惟有等下次開騷。他直言希望有機會開part 2或做世界巡唱，「最開心係聽到好多feedback，好多人對今次呢個show都好欣賞，我覺得係最大肯定。」他笑言完show先放肆食自助餐，其他再視乎公司安排。

與蔣雅文保持聯絡

至於獲謝霆鋒捧場，問到可不請他上台做嘉賓時，他笑言，「我唔夠膽，佢已經千叮萬囑，我話你想點就點，大佬！其實佢肯嚟，我已經好榮幸，因為佢連演唱會都好少睇。」昨晚他亦有感謝張敬軒、古巨基、Mandy蔣雅文等為他拍片，他指公司同期出道的歌手都感情要好，Kenny表示，「其實我同Mandy一直有聯絡，因為我哋同一年出道，一齊住同一地區，所以嗰段時間都好close，因為佢喺台灣，但都二話不說幫我拍片。」對於首場嘉賓容祖兒哭成淚人，「邊有人做嘉賓上台喊成咁，搞到我都眼濕濕。」Kenny笑指年紀大了，更懂得珍惜，容易感觸。

Tyson爆seed：紅隧瀨屎

尾場嘉賓是Tyson Yoshi，兩人合唱《1994》後，即有觀眾叫Tyson除衫，Kenny笑言特登穿得密實，讓Tyson除衫，Tyson笑著拒絕：「除衫要睇場合，做後輩要識分莊閒。」Kenny指Tyson附合「Peter Pan」小飛俠的人設，自由自在，豈料Tyson回應，「因為我係富二代啫！」全場爆笑，Kenny追問：「咁究竟係唔係啫？」Tyson笑住話：「我唔係呀。」兩人因做Gym結緣，自封為「打風Gym Buddy」Kenny大爆Tyson彩排完畢也趁空檔去做Gym，Tyson爆seed：「紅隧瀨屎，所以返嚟！」接著他自爆因為無法做Gym，「諗著戴口罩同笠帽，無人會認得我，X街，好多人認得，平時次次話影相我都會影，我想同頭先班受友講唔好意思，因為我喺嚟做嘉賓，suppose係秘密，所以好尷尬，冇影相，唔好意思。」

贏咗99%嘅人

Kenny受訪表示兩個星期前邀請Tyson，加上他是早幾月在同一場館開騷，算是「前輩」，別具意義。作為「打風Gym Buddy」，他笑言摸過Tyson胸肌，「贏咗99%嘅人！」被問到是否超時，故此Tyson沒有獨唱環節，他表示，「佢話諗唔到唱乜，唔想勉強佢，同埋昨晚嘉賓Fiona(薛凱琪)唱歌都唔係換衫位，咁都OK。」雖然Tyson叮囑他今日如常做Gym，但Kenny就表示要休操兩天。對於Tyson在台上爆粗，他表示，「真係有？我聽唔到。點解我請佢，因為好似Peter Pan好自我，唔會理其他人點諗，包括昨日嘅Fiona，都係繼續做自己嘢。」

寶貴經驗學執生

對於被Fiona在台上表示曾誤會Kenny追求她，Kenny笑言，「乜有咁大誤會，真係估佢唔到，有個天大嘅誤會，最估計唔到係，佢話同我食過一次飯，我諗到依家都諗唔返，真係好抱歉。」他表示很早已邀請Fiona，但對方現正進行巡迴演唱會，後來發現夾到時間，還主動提出拍片，好支持他。

首次擔任演唱會創作總監，Kenny親身體驗開騷不容易，但聽到觀眾歡呼聲，就忘記一切辛苦。談到首晚跳空中pole dance，因機件失靈無法完成，他認為是寶貴經驗，「我學識好快執生同calm down自己情緒，同埋嗰刻突然間成班dancer企起身，跟著音樂表演一段戲，係執生冇排過，所以呢個騷同好多人有bonding，無論dancer或band，大家有點契先可做到呢件事。」對於昨晚在街頭健身環節失手撻在地上，他自言太輕敵，遺憾地有點不完美。