監製田啟文與自編自導自演的鄭中基、胡耀輝導演、周秀娜和姜皓文，出席電影《阿龍》首映禮。(林俊源攝)
由鄭中基自編自導自演的電影《阿龍》，胡耀輝聯合執導，周秀娜、姜皓文和童星傅舜盈等主演，2018年拍攝，相隔7年終重見天日在香港公映，卻一波三折，映期由4月改到6月再改至9月4日(周四)上映，監製田啟文昨日(2日)現身首映禮，接受am730專訪時解釋映期再三延後的原因，「最大原因係起初簽咗嘉禾院線，但我哋收到消息佢哋將會全線結業，但佢哋未公布之前，我哋又唔講得，我哋又擔心部戲上畫時，戲院會結業，所以等嘉禾宣布結業後，我哋重新搵過發行公司接手。」他續指原打算8月暑假檔假公映，但考慮到《無名指》亦同期上畫，「既然依家香港電影市場未係特別理想，唔好堆埋一齊，等《無名指》上映先，加上呢部戲唔一定要暑假上，唔係好適合小朋友睇，所以延到9月。」
不排除再推足本導演版
至於為何相隔7年才上映，田啟文不諱言與內地審批有關，內地的考量始終有別於商業決定，「例如國家與友好鄰邦關係良好，你(套戲)講佢唔好，佢哋(內地)會有呢啲疑問，咁我哋覺得，國家同好多地方都友好，我哋係咪全部唔講得，所以呢啲嘢需要時間槷釐清。」他坦言本計劃《阿龍》以三級片形式上映，但因應審批要刪剪部分暴力畫面，結果變成2B級別電影，「我哋想以較寫實手法凸出嗰種殘酷，例如鑽頭、鋸手指都拍晒，同埋獄中俾人搞，呢啲都拍晒，但都被剪走，冇咗激進場面。」問到會否上映導演本或以串流方式上映足本版，他坦言仍在考慮中，「要先望吓市場需要，同埋觀眾反應再決定，反正啲片都喺度。」
下半年有戲開
談到香港電影寒冬，田啟文表示，「其實下半年一直有戲開，唔喺完全停頓，所以我覺得又唔係真係咁差，其實陸續開緊戲，投資者睇題材同係咪值得。」對於有指太多學院派寫實題材，令投資者卻本之說，他就強調，「學院派都有可取地方，唔同嘅人做唔同嘢，巿場需要百花齊放。」近期多部中外經典電影如《一一》、《PTU》等以4K復刻版形式上映，他不認為是救巿辦法，只是回憶，「如果復刻版救巿，我哋行業就大件事。」
ADVERTISEMENT
🥮請你食皇玥經典流心雙輝月餅🥮
👇🏼立即登記參加👇🏼
