《頭文字D》粉絲齊集邵氏影城，在全球頂級設備的後期製作影院，欣賞電影4K修復杜比全景聲版本。
劉偉強執導經典電影《頭文字D》最近4K修復杜比全景聲（Dolby Atmos）重返大銀幕，20年後再次成為港產片票房冠軍。日前，電影導演劉偉強和麥兆輝、原創音樂陳光榮、混音李耀強、擬音杜本立，以及十幾架AE86、GTR和FC車主和愛車聚集邵氏影城，在全球頂級設備的後期製作影院，欣賞《頭文字D》4K修復杜比全景聲版本。映後分享會上，劉導更連環發放多個重磅秘密，令一眾「頭D迷」嘩聲四起！
周杰倫逐粒字配音
觀眾問周杰倫真人配音難度，麥兆輝說：「引擎聲太大，演員對白收唔到，之後mixing會好困難，所以全部演員都要入錄音室配音。周杰倫幾乎逐個字錄，但佢係音樂人，耳仔好靈，聽得好準，配合口型亦好準確。花咗好多時間，可能破咗MBS（配音公司）單人配音紀錄，淨係佢一個人錄咗4、5日。」劉導透露周杰倫最初不想親自配音，但劉導拒絕，認為fans一定認出。
劉導原本演Benz叔叔
而另一個「謎」，就是女主角夏樹的金主「BENZ叔叔」是誰？劉導爆料：「原本係我！」全場笑聲。他說：「麥兆輝同莊文強呃我，又話見唔到樣，又話淨係影到隻手。」麥兆輝說：「佢曾經好認真咁諗過。」劉導笑言：「結果因為我要揸機拍飛車，又要喺現場鬧人，唔得閒做！」陳光榮被問到電影原聲碟的歌曲順序與電影有別，他說：「係我排嘅，原聲碟以音樂行先，所以重新編排序。今年仲會出黑膠碟，依家喺日本印緊。」他透露戲中日本夜店一幕，背景日式懷舊歌都是他創作，並說：「我搵咗位日本朋友幫我真唱，然後加埋Hip Hop穿梭，推動劇情，依家睇返都好滿意。」他表示電影音樂創作靈感來自影片，說：「opening見到余文樂和陳冠希，咁靚仔有型，我冇辦法唔用Hip Hop加Rap。頭先睇返好感動，聽到我支結他20年前嘅聲音！」
席上，劉偉強導演分享20年前拍攝花絮，他介紹當年拍攝器材，說：「喺車頭嗰舊黑色支架，可以伸到好長，拍車過車鏡頭最啱。當年冇航拍，呢個支架係當時最新器材。」他又爆料：「當年寰亞電影話會開拍《頭文字D》，導演係徐克。」全場嘩然。他說：「當年個個後生都鍾意車，個個都想拍。我之前拍《烈火戰車2極速傳說》致敬《頭文字D》，開始拍飄移，陳光榮寫『頭搖又尾擺』都係形容drifting（飄移）。」點解最後由他和麥兆輝做導演？劉偉強說：「我諗係命運，每套戲都有條命！」
劉偉強特別感激已故音響大師曾景祥（Kinson）及其團隊，Kinson憑《頭文字D》於「第25屆香港電影金像獎」獲得「最佳音響效果」獎項。其徒弟、當年有份在AE86裝收音設備的擬音杜本立，在分享會上圖文並茂解說：「最初都唔知點放啲咪，要收引擎、車內、死氣喉，同埋尾碌響軚聲，但無位裝喺個碌度，結果我趁無人發現用螺絲批篤穿塊沙板，放支咪入去。」劉偉強說：「感謝Kinson，因為佢當年幫《頭文字D》個音響底做得好好，令到今次攞出嚟做Dolby Atmos好順利。仲有要鳴謝林建岳博士和寰亞電影，喺咁嘅時期都肯投資做4K和土比全景聲，多謝AE86車隊和觀眾。」
ADVERTISEMENT
立即更新/下載AM730手機APP 體驗升級功能
