2025-09-23 10:00:00

Stephy開騷獲未來奶奶來港捧場澳門高叉舞衣被男友指太性感(有片)

鄧麗欣(Stephy)於周日(20日)剛完成兩場澳門演唱會，昨晚(22日)馬不停蹄又再出席品牌活動，Stephy大讚曾在劇集《男排女將》合作的陳卓賢Ian，跟自己一樣整齊有條理，在男生中甚為罕見。Stephy將於周日出席新加坡舉行的《JAM OFF 2025》音樂節，屆時與韓國天王Rain鄭智薰同場，問到「翻版Rain」台灣男友可會同行時，她就半說笑道，「今次唔帶佢去，費事同正版有衝突！」接著，她才認真表示，男友剛好要返台灣，故今次未能陪伴左右，並表示首次出席音樂節，心情緊張。

鄧麗欣Stephy為演唱會操練「老鼠仔」有成效，笑言完騷會Keep住。(娛樂組攝)

操肌有成效完騷Keep住做Gym

談到早前為澳門演唱會勤力操肌，在台上大騷「老鼠仔」和背肌，她開騷前在IG分享操肌短片，更指「肌肉酸痛嘅感覺 (尤其pat pat好有存在感)，獲網民大讚體脂極低fit到爆，Stephy自言亦好滿意成果，並愛上做Gym，她再：「做開Gym嘅人就明白，嗰種肌肉酸痛，尤其喺臀部，你會覺得好有存在感，所以有少少愛上咗。」她表示會趁打風在家繼續操練：「我會keep住，唔會完騷就放棄，因為自己都鍾意做Gym後嘅線條，我仲發現做Gym後，身體狀況變好咗，以前着高踭鞋會腰痛，可能而家識用力，所以好有幫助。」

高叉舞衣超性感

至於澳門騷唱《派對動物》的歌衫高叉位比香港站更高，Stephy透露本來的設計更誇張，令她擔心，「雖然靚，不過可能會嚇親觀眾，最後改闊返少少，原本係仲V，即係仲高叉啲；同埋自己都有啲驚，有時跳舞，雙腳會擘大，都驚走光。」至於男友可有投訴太性感，「佢(男友)講笑話太性感，不過靚嘅。」而男友亦有陪同鄧媽媽睇騷，非常孝順，而未來奶奶亦對她十分支持，「香港個騷佢都有嚟睇，同佢(男友)細佬一齊睇。(好支持未來新抱？)佢可能佢欣賞我，特登嚟睇。」她表示有計劃稍後與男友一齊放假旅行。