何君堯創辦慈善團體發布新書，冀以生命影響生命（陳芷晴攝）
立法會議員何君堯創辦嘅慈善團體「匯蝶公益」今日舉行新書發布會，《一人一故事》（第五期）收錄咗36位老友記同2位年輕人嘅人生篇章。何君堯希望透過呢啲無論係平凡定係傳奇嘅故事，以生命影響生命。
56歲嘅宣希文係新書收錄嘅其中一個故事，佢出席記者會，分享人生中最難忘嘅經歷莫過於喺新冠疫情期間參加義工服務。佢回想當時喺新聞見到何君堯嘅緊急呼籲，急需眾多義工幫護老院分擔日間雜務。嗰一晚，宣希文一直掛心住嗰啲急需幫助嘅長者，輾轉反側瞓唔到。去到第二朝即刻報名，開始咗為期個幾月嘅義工工作。宣希文當時被分配去葵芳嘅一間頤養院，每星期工作6日，每日大概8個半鐘。宣希文總結呢段經歷唔只係難忘嘅過去，更加係一場心靈洗禮之旅。
藍鴻震鼓勵長者
出席記者會嘅前民政事務局局長藍鴻震都係長者，但佢講笑話「我都唔承認自己係長者，唔係84歲，只係48歲」。佢鼓勵長者「機器用得耐，螺絲鬆咗，呢度痛嗰度痛係正常。螺絲鬆咗就擰一擰，甩咗皮就油吓油，好小事」，提醒老友記平時要注意飲食，多做運動，同埋繼續以生命影響生命。作為司儀嘅國家安全教育中心課程統籌朱偉明仲爆料，話藍鴻震好勤力，見過佢喺辦公室地氈做瑜伽，佢就送張瑜伽墊畀佢，等佢唔使咁慘呀！
【立即參加】送Rollink全球最輕薄可摺疊手提行李箱🧳！
