林超英(右)貼出舊年同Luna Is A Bep合唱嘅歌曲MV截圖，似乎再提大家一次唔好再問佢喇。(音樂影片截圖)
本港踏入夏季氣溫逐漸炎熱，而一講到開冷氣好多網民就會諗起炎夏都唔開冷氣嘅前香港天文台台長林超英，甚至每年一到夏天就大批網民關心佢開唔開冷氣。林超英今日就作出「超前部署」，率先交代情況。
交代有一例外情況要開冷氣
林超英喺社交平台話，近嚟遇到唔少關心佢嘅人，都問佢有冇開冷氣，而個答案就係「還沒有」。不過，佢亦加多句有例外開冷氣嘅情況，就係當孫女日頭喺佢屋企而氣溫又甚高嘅日子，嗰時佢就會開冷氣但較到攝氏27度，而今年至今只係為咗咁而開過3、4日冷氣。
其實，林超英自從前年孫女出世之後，都已經「破戒」為咗孫女而喺日頭開冷氣，當時溫度同樣較27度，屋企同時亦會開住個細風扇。佢今日嘅帖文就配上舊年同獨立歌手Luna Is A Bep合唱嘅《超英歌》MV截圖，句歌詞就係「唔好再問我有無開冷氣，如果我開冷氣我會通知你」，似乎再提大家一次唔好再問佢喇。
請你飲屈臣氏咖啡 + 送咖啡豆
