一群來自各行各業的員工，因人工智能(AI)急速發展，取代了人手工作而面臨失業。加上他們各自都陷入財困，故此這456名參賽者，為了贏取巨額奬金，決定參與一場由神秘富豪組織舉辦的「魷魚遊戲」。
「123，紅綠燈！」在第一個「紅綠燈」遊戲裏，當木頭公仔回望時，只要參賽者靜止不動，並在限時內抵達終點便可過關。編號456的參賽者，本身是骨科醫生，在比賽時巧遇一位的士司機，且與他並肩作戰，一邊閒談，一邊向終點進發。
「我揸咗咁多年的士，不嬲都遵守交通規則，第一關玩『紅綠燈』應該難唔到我⋯⋯停！」
「我見你話停就停，平時揸車實係好穩陣，但係點解你條頸，戴咗個頸托嘅？」
「得我一個揸車穩陣有用咩！早排我揸夜更，前面架Tesla急煞，我尾隨收掣不及，所以就Chok親條頸，到依家都仲未好返。」
「你條頸應該係出現咗馬鞭式創傷(Whiplash Injury)：喺撞車嗰一剎那，上身有安全帶固定，但頭同頸卻因為物理學上嘅慣性而急劇擺動，動作就好似揮動馬鞭咁，條頸彎曲嘅幅度，超過咗正常生理範圍，結果就拉傷咗頸部嘅肌肉同靭帶。」
「係呀！撞車之後，我條頸一路都又痛又僵硬，啲痛仲會擴散到上背同膊頭，加上會出現頭痛、頭暈，集中唔到精神，記性又差咗，甚至晚晚失眠，連情緒都開始暴躁咗。去咗睇醫生同物理治療師，佢哋都只係話：『幫緊你，幫緊你！』」
「馬鞭式創傷，通常係靠臨床檢查同埋照X光嚟斷症。但如果出現手腳麻痺或無力，懷疑有頸椎間盤突出，壓住咗神經線，咁就要照MRI去Check清楚。治療方法包括休息、服食消炎止痛藥、接受物理治療。同埋可以戴軟身頸托，嚟限制頸椎活動一段短時間，等受傷嘅軟組織自然癒合。大多數傷者，都可以喺幾個星期至幾個月內康復。但假如神經受壓嘅症狀持續，MRI證實有嚴重嘅頸椎間盤突出，咁就需要做減壓手術啦！」
「醫生你咪掛住講嘢啦！因住個木頭公仔Scan到你郁，開槍射你呀！」
「係呀，不過啲有錢人同大企業支『槍』暫時對準嘅目標，係將會被AI取代嘅行業，例如發展自動駕駛，嚟減省請司機嘅成本。等到將來技術成熟，仲可以預防人為嘅交通事故。如果司機大佬你仲係故步自封，就好似成日戴住個頸托咁自保，條頸就會硬到想郁都郁唔到，揸車就會睇唔到『盲點』，白白錯過咗Cut線轉型嘅機會。」
「你叫我轉型？我700萬買個的士牌返嚟，依家跌到得返200萬，我死都唔認輸！我學緊阿拉伯話，將來香港一定有大把中東遊客！我一定要贏呢個『魷魚遊戲』，我⋯⋯」
「嘭！嘭！嘭！」說話之間，打字員、接線生和隧道收費員三位參賽者，都相繼應聲倒地。
作者為骨科專科醫生