網絡一周內先後捧紅兩個人。先有「仙氣女學生」開學日遲到，被電視台訪問時眼神淡然、語氣優雅地表現出超脫嘅仙氣，帶起「遲都遲了」嘅網絡風潮，得到網民一致讚好及欣賞。另一位係「爆seed媽媽」，使600蚊同阿仔一早買飛入場，但因為牌照問題，熱氣球有得睇冇得坐，激動到對住鏡頭鬧主辦方安排，一口氣講足幾分鐘，流利而無粗口，深得網民讚賞。
兩件事，其實都係面對錯誤嘅反應。一個係自己點回應自己嘅錯(靚還靚，遲到都係唔啱嘅)；另一個係對人哋錯誤嘅反應(主辦方安排不周)。
如果將兩個人掉轉場景又會點呢？
「仙氣女學生」去到熱氣球嘉年華發現冇得坐，淡淡然咁話︰「買都買了，唔緊要啦。」咁又會唔會得到咁多人關注呢？或者「爆seed媽媽」返學遲到激動地衝入學校，拋低一句︰「血壓升到200啦！」又會唔會被網民講足幾日呢？
其實如果有人可以淡然面對人哋嘅錯，選擇原諒放下，唔係更難得咩？又，如果有人激動地承認自己錯誤，而唔係用官方口吻去推卸，又落力彌補，唔係更值得大家讚賞咩？以上情況，唔係先更值得我哋瘋狂傳播咩？
說穿了，兩位紅人之所以洗版式走紅，都係因為兩條影片有最重要嘅元素：影像(visual)，即係兩位女士嘅表情語氣。只要你諗下成件事嘅背景，就會發現其實冇需要咁誇張，亦唔係咁值得講。但係仍然得到世界眼球、成為網絡歷史嘅，就只有……要麼清新脫俗，要麼激動張揚……毋須分析，只須養眼。
就好似娛樂圈咁，我哋成日討論藝人嘅私生活同佢哋嘅為人，從而投放好多感情俾佢哋，每次演出、每個作品、甚至佢哋推出嘅周邊產品都會課金支持，仲會無限聯想佢嘅為人。喂，真係咁嘅咩？
不過，真相從來都唔緊要，最緊要係，下次藝人開餐廳又好，出T恤又好，大家預備定多幾個600蚊，仲要早啲去買，千祈唔好遲到。