網上流出一張已填妥的金像獎選票。
《金像獎》圓滿舉行，得獎名單冇咩驚喜，我3個月前已講︰衛詩雅拎最佳女主角係100%冇懸念，有文為證。反高潮位係發生喺頒獎禮之後，有疑似專業界別嘅選民，上載金像獎「選票」相片，「最佳音響效果」一欄填咗係電影《九龍城寨之圍城》嘅3位提名人，該名選民仲聲稱一收到張選票就有人填咗，自己淨係簽個名就得。帖文立即被瘋傳，網民熱烈討論︰電影圈真係咁黑暗？
金像獎一直都係一個業界選舉，唔係全民投票，而係由業內唔同嘅屬會同埋從業員做評委投票選出。專業投票同民選唔同，唔係要選出「最多人鍾意」，而又因為只有業內人或者有一定資格嘅專業人士先有得投票，所以大家會期望選出嚟嘅就係代表「最優質嘅」。前者等於支持度，後者等於專業品質，事實又係唔係咁呢？
呢個問題要視乎究竟呢班業內人士用乜嘢準則去投票，如果佢係用專業知識，業內經驗累積嘅眼光等去評選，無論選擇係咪符合一般人嘅心水，都的而且確係一個專業評審；但如果有業內人士因為自己嘅行業資格而有權投票，但卻因為不同原因、主動或被動地著重其他非專業因素考量而作出選擇呢，咁就唔可以話係專業評審。而又如果有若干人都係咁樣非專業地評審，令選擇可以壓倒勝地影響賽果呢，咁個單位即使得獎，相信就唔能夠話係「業內認可」，頂多只係「業內結果」而已。
當然，「業內結果」都係反映權衡利弊或力量較量嘅結果，簡而言之就係邊個有power。電影業嘅產業鏈咁長，由製作、出品、發行到放映，中間仲有咁多持份者，大家都可以秤下邊個單位喺邊個環節最有power。
講咗咁多，我都必須戴返個頭盔，以上只係講緊當專業人士唔係用專業準則評選，就會可能會出現嘅情況，一句簡單結論：專業人士，唔等於專業準則。而我必須重申，我相信金像獎係十分專業，很有權威的啊！