代禱信風波
Mo爸(李盛林牧師)上周一封代禱信，暗示阿Mo嘅醫療費用未能確實會否繼續，公司回應傳媒時就話因為有司法程序唔評論，又透露過去3年幾一直負責阿Mo嘅醫療及相關開支，亦額外俾咗1,000萬佢哋。以上發展令呢件表面平靜咗一段時間嘅事，喺網上世界引起好多討論。有人覺得公司已仁至義盡，批評Mo爸貪得無厭，亦有人覺得Mo爸只係愛子心切。
討論走向兩極，緣於網民搵返好多紀錄去對證，亦有各自演繹，但比起過去嘅事，我更想以目前嘅情況去反思。
一/ 阿Mo嘅進展。Mo係頸椎第4節受損，最初完全失去活動能力，呢幾年一直見到佢有一啲相對其他同類病人嚟講大嘅進步。除咗睇代禱信，阿Mo近期再次活躍於社交網站，仲同網民有互動亦可以反映到呢一點，我相信同類病人未必會有呢個進展，除咗係Mo爸講嘅神蹟，我相信亦係好多醫護、科技同工作人員合力之下，先可以將外界嘅財力資助，轉化為呢個結果。
二/ 事故嘅責任。法庭已就事故嘅刑事責任有咗裁決，而喺審訊期間嘅陳述，揭露事件嘅經過，三年幾以來，大家對於一個演唱會嘅主辦、承辦商、工程分判商各自責任、舞蹈員嘅僱傭關係等，都有咗更清晰嘅了解，唔會再係邊個最大、最有財政能力就一定責任最大。
三/ 網民嘅反應。網上就呢個討論清晰分為兩派，互相質疑係打手，講真，我覺得喺香港呢個資訊流通、市民學識相對高嘅社會，要做到搵打手帶到風向唔係咁容易，否則好多事情都可以請打手就搞掂，唔使使咁多錢。多咗唔同意見，或者係因為三年來，我哋都上咗一課，對成個事故認識更多，同情以外，亦多啲睇件事嘅本質。
執筆之時，Mo爸又有新一封代禱信，提及代禱信內容經常都係同阿Mo溝通過之後先出，唔知網上又會唔會有一番討論。不過無論大家討論如何，我希望大家都少啲鬥氣，多啲為阿Mo打氣。