ViuTV劇集《哪一天我們會紅》大結局，見到唔少網民話有失落感，港劇幾耐冇帶俾人這種感覺？ViuTV近半年好似食咗藥咁，綜藝同劇集都接連有好作品。《足球女將》、《堅返鄉下》、《三命》到《麻甩媽咪》，再到《哪一天我們會紅》有超高討論度，睇到台前幕後嘅努力。最近有廣告界朋友都話願意加大銀碼落ViuTV，而同時又覺得大台嘅《愛．回家》都多觀眾，值得落廣告。
兩個台內容同模式南轅北轍，但可以共生。一個好睇好笑之餘，亦有思考、有靈魂，所以有正面回響，廣告商亦願俾錢；另外一個，可能有啲觀眾邊睇邊鬧，但又會好上癮，一樣有鐵票。各有各做，觀眾同客戶有更多選擇，絕對係好事。
情況就如social media，《哪一天我們會紅》裡面凌文龍講得好，好多短片會令到觀眾冇耐性，諗嘢又會簡單，但好似速食一樣明知冇益都食。我覺得冇問題，因為係人性，重點係唔好過量。
戲中所講呢個世界就係流量為王，我有保留，當然流量做到極致，就算冇咩深度質素，一樣賺到錢；相反有質素，都一樣有捧場客，亦會賺到錢。每條路都有好有壞，只要有空間就會有出路。但如果是但一方嘅存在大到令其他人完全冇生存空間，例如有一日網上短片係唯一能夠生存嘅模式，令到全世界只要短暫多巴胺，而失去咗欣賞好嘢嘅能力或者耐性，後果就不堪設想。當然你可以話係觀眾嘅選擇而造成，但到時好似外賣平台咁，某方大到扼殺其他人嘅空間，結果就係內容創作者就好似班車手一樣，開始俾人減人工，而市民就算外賣遲來又倒瀉晒，我諗投訴都冇用。
所以唔係要盲撐一方，而係要平衡，就好似飲食要均衡，樣樣嘢都睇下，冇人叫你一定淨係要幫襯小店，但一星期咁多餐，可唔可以分開下叫，食下唔同嘢呢？