騰訊喺澳門搞咗個年度超大型音樂會，規模同嘉賓名單，都睇到騰訊明顯有野心超越韓國嘅MAMA。而今年嘅嘉賓除咗頂級嘅韓團之外，仲有姜濤同MC張天賦兩位香港代表。其中姜濤連續跳唱差不多30分鐘，粉絲當然非常滿足，我就睇到以下幾個訊息。
第一，選歌有心思。姜濤先基本動作唱自己作品嘅串燒，第二部分就揀咗好多MIRROR同ERROR團友嘅個人作品，以MIRROR團歌作結，明顯想傳達一種團結嘅氛圍。MIRROR近日經常被討論會唔會散，姜濤似乎想俾大家一個答案。呢個亦係佢哋公司一直以來聰明嘅手法，即使未必全團都咁紅，佢哋總會搵到方法突破，將整個團嘅歌曲同認知度，透過個別成員，先提升，再引入。
第二：發放正能量。姜濤墮海事件一個月都未到，演出以外，身形、心理狀況都係焦點。見到佢瘦咗見鎖骨，又炸爆舞台，裡外都發放正能量。姜濤呢幾年有表現唔理想嘅時候，亦有被人無的放矢嘅時候，但係都能夠好快咁表現返一啲正能量出嚟，我覺得呢個都係重要嘅，亦反映姜濤仲有好長好長嘅路可以行 。
第三：擴大受眾市場。表演當晚有TWICE、aespa呢啲韓國天團同場，公司明顯俾咗好多資源準備呢場表演，正如之前Marf@COLLOR獲邀喺COLDPLAY啟德演唱會表演一樣，公司都有安排大量舞蹈員，重新編排歌曲等等，即使分分鐘蝕住做，但都希望歌手把握大型表演機會，令更多受眾睇到佢哋。今次見到姜濤仍然係有擴展受眾群嘅野心，想去到更大嘅舞台，用行動反駁話佢已無心戀戰嘅質疑。
廿幾歲經歷多次打擊，仍然可以極速復原，展現正能量。我覺得討論姜濤已經唔再只係有冇才華呢個層次，亦要著眼佢調節心情抗壓嘅速度，因為呢樣先係佢其中一個可以走落去嘅特質 。